الیکشن کمیشن نے جرمانے ادا نہ کرنے والے امیدواروں کی فہرست جاری کر دی ہے جس میں بانی پی ٹی آئی بھی نادہندہ نکلے ہیں۔
اے آر وائی نیوز کے مطابق الیکشن کمیشن نے جرمانے ادا نہ کرنے والے امیدواروں کی فہرست جاری کر دی ہے جس میں خیبر پختونخوا کے مختلف سیاسی رہنما ای سی پی کے نا دہندہ نکلے ہیں۔
دستاویز کے مطابق بانی پی ٹی آئی سمیت سابق وزیر اعلیٰ محمود خان بھی الیکشن کمیشن کے نادہندہ نکلے۔ ان کے علاوہ تحریک انصاف کے کئی سابق وزرا، اراکین اسمبلی بھی نادہندگان کی فہرست میں شامل ہیں۔
دستاویز میں بتایا گیا ہے کہ جلسے جلوسوں میں 37 امیدواروں نے الیکشن کمیشن کے قواعد وضوابط کی خلاف ورزی کی۔ جو سیاسی رہنما الیکشن کمیشن کے نادہندہ ہیں ان میں کامران بنگش، تیمور جھگڑا، شوکت یوسف زئی، اشتیاق ارمڑ، پی پی کے سیکریٹری اطلاعات امجد آفریدی، جماعت اسلامی کے عنایت اللہ خان بھی شامل ہیں۔
الیکشن کمیشن نے متعلقہ آر اوز کو امیدواروں سے جرمانے وصول کرنے کی ہدایت کرتے ہوئے کہا ہے کہ جانچ پڑتال کے دوران امیدواروں سے جرمانے وصول کیے جائیں۔
الیکشن کمیشن کے مراسلے کے مطابق جرمانے ادا نہ کرنے والے امیدواروں کے کاغذات نامزدگی مسترد ہوں گے۔
