راولپنڈی : پاکستان تحریک انصاف کے رہنما بیرسٹر عمیر نیازی کا کہنا ہے کہ بانی پی ٹی آئی نے اتوار کو الیکشن کمیشن فیصلے کیخلاف احتجاج کی کال دی ہے۔
تفصیلات کے مطابق بانی پی ٹی آئی سے ملاقات کے بعد بیرسٹر عمیر نیازی نے میڈیا سے گفتگو کرتے ہوئے کہا گفتگوبانی پی ٹی آئی نے اتوار کوالیکشن کمیشن فیصلے کیخلاف احتجاج کی کال دی ہے۔
عمیر نیازی نے بتایا کہ بانی پی ٹی آئی نے کہا پی ٹی آئی واحد ہے جس نے خواتین کونمائندگی دی،الیکشن کمیشن کے فیصلے سے کے پی کے خواتین کے حق پر ڈاکہ مارا گیا، اتوار کوتمام ایم پی ایز،ایم این ایز ،پارٹی کارکن ملک بھر میں احتجاج کریں گے۔
رہنما پی ٹی آئی نے بتایا کہ دھاندلی کے خلاف پہلے ہی ہماری تحریک چل رہی ہے، ہماری مختلف جماعتوں کے ساتھ بات چیت چل رہی ہے، 6،5 جماعتیں تو دھاندلی کے خلاف تحریک کیلئے متفق ہیں، ہم نے صدارتی امیدوار چھوٹے صوبے سے نامزد کیا ہے۔
ان کا کہنا تھا کہ اسلام آباد ہائیکورٹ میں رٹ کیساتھ حکم امتناع کی درخواست بھی دائر کررہے ہیں، ہماری درخواست کہاں تک سنی جائے گی یہ کہنا قبل ازوقت ہے،درخواست پر کورٹ کا کوئی مناسب آرڈر آیا تو اثر صدارتی الیکشن پر ضرور پڑے گا، ہماری درخواست عدالت نے سنی تو صدارتی ،سینیٹ الیکشن متنازع ہوجائے گا۔
عمیر نیازی نے مزید بتایا کہ بانی پی ٹی آئی نے کہا ہے عوام نے اپنا بھر پور کردار ادا کیا ہے، اب مینڈیٹ چوری معاف نہیں کریں گے۔
