راولپنڈی: اڈیالہ جیل میں قید بانی پاکستان تحریک انصاف کا کہنا ہے کہ صدر پاکستان عارف علوی نے قومی اسمبلی کا اجلاس نہ بلا کر بالکل ٹھیک کیا۔
اڈیالہ جیل میں میڈیا سے بات چیت میں سابق وزیر اعظم نے کہا کہ ہماری پارٹی جیتی ہوئی ہے مگر مخصوص نشستیں نہیں دی جا رہیں، الیکشن میں پی ٹی آئی کو ختم کرنے کی پوری کوشش کی گئی، ظلم سے پارٹی ختم نہیں ہوئی بلکہ وہ سب سے مضبوط جماعت بن گئی۔
بانی پی ٹی آئی نے کہا کہ عوامی مینڈیٹ سے بڑی کوئی چوری نہیں ہو سکتی، ساری قوم کہہ رہی ہے دھاندلی ہوئی 20 نشستوں والے کو وزیر اعظم بنایا جا رہا ہے، چیف الیکشن کمشنر کا استعفیٰ ضرور بنتا ہے کیونکہ انہوں نے ہمیں لیول پلینگ فیلڈ نہیں دی۔
گفتگو کے دوران صحافی نے سوال کیا کہ آپ فضل الرحمان کو ڈیزل اور محمود اچکزئی کو غدار کہتے تھے آج رابطے بڑھا رہے ہیں۔ اس کا جواب دیتے ہوئے بانی پی ٹی ٓئی نے کہا کہ مسلم لیگ (ن)، پیپلز پارٹی اور متحدہ قومی موومنٹ پاکستان کے خلاف ہیں جنہیں دھاندلی کر کے جتوایا گیا۔
سابق وزیر اعظم نے کہا کہ نگراں حکومتیں بھی ہمارے خلاف لگائی گئیں، الیکشن کمیشن انتخابات کے بعد بھی دھاندلی میں مصروف ہے، ہفتے کے روز دوبارہ احتجاج کی کال دینے لگے ہیں، انہوں نے کہا کہ ہرائی جانے والی جماعتوں کو اکٹھا کر رہے ہیں ان کے ساتھ مل کر احتجاج کریں گے۔
’پارٹی رہنماؤں سے مشاورت کے بعد آج آئی ایم ایف کو خط بھیج دیا جائے گا‘
بانی پی ٹی آئی نے کہا کہ آئی ایم ایف کو لکھا جانے والا خط غداری قرار دیا جا رہا ہے جبکہ فیٹف قانون سازی کی تو انہوں نے مخالفت کی تھی، مطالبہ کیا جا رہا تھا کہ ان کے کیسز ختم کیے جائیں۔
بانی پی ٹی آئی نے کہا کہ میں جیل سے کوئی بھی چیز لکھ کر باہر نہیں بھیج سکتا، آئی ایم ایف کو لکھا جانے والا خط میں نے ڈکٹیٹ کروایا ہے۔ اس موقع پر صحافی نے سوال کیا کہ کیا آئی ایم ایف کو خط بھیج دیا گیا ہے؟ اس پر انہوں نے جواب دیا کہ خط ڈکٹیٹ کروانے کے بعد پارٹی رہنماؤں سے ملاقات نہیں ہوئی۔
ان کا کہنا تھا کہ آج پارٹی رہنماؤں سے ملاقات ہوگی جس کے بعد خط کا علم ہوگا، خط میں یہی لکھا جائے گا کہ سیاسی استحکام کے بغیر معاشی استحکام نہیں آ سکتا، تمام معیشت دان یہ کہتے ہیں کہ وسائل پیدا کیے بغیر قرض پر ملک نہیں چل سکتا۔
انہوں نے کہا کہ پارٹی رہنماؤں سے مشاورت کے بعد آج آئی ایم ایف کو خط بھیج دیا جائے گا۔
صحافی نے سوال کیا کہ محمود اچکزئی آپ کے ساتھ مل جائیں تو کیا پھر وہ غدار نہیں ہوں گے؟ بانی پی ٹی آئی سوال کا جواب دیے بغیر چلے گئے۔
