کراچی سے پکنک پر جانے والے ایک ہی فیملی کے 4 افراد منوڑا کے ساحل پر ڈوب گئے۔
اے آر وائی نیوز کے مطابق منوڑا کے ساحل پر 2 خواتین سمیت 4 افراد سمندر میں ڈوب گئے، افسوسناک واقعہ ہٹ نمبر 65 اور 67 کے درمیان پیش آیا۔
ریسکیو ذرائع کا بتانا ہے کہ دو خواتین اور ایک مرد کی لاش نکال لی گئی ہے جبکہ ایک کی تلاش جاری ہے۔
پولیس کا بتانا ہے کہ ڈوبنے والے خاندان کا تعلق کراچی کے علاقے دستگیر سے ہے، تمام افراد پکنک منانے کے لیے منوڑا کے ساحل پر آئے تھے۔
واضح رہے کہ دو ماہ قبل ہاکس بے کے ساحل پر چار خواتین سمیت پانچ افراد سمندر میں ڈوب گئے تھے۔
واقعے کی اطلاع ملتے ہی لائف گارڈز اور ریسیکیو اہلکار مدد کے لیے پہنچے اور پانچوں افراد کو سمندر سے بے ہوشی کی حالت میں نکالا تھا۔
پولیس کا کہنا تھا کہ اسپتال منتقلی کے دوران راستے میں ہی ایک شخص دم توڑ گیا تھا جبکہ ڈوبنے والی خواتین کو اسپتال منتقل کردیا گیا جہاں ایک خاتون بھی چل بسی تھی۔
متاثرہ خاندان لیاقت آباد نمبر 3 گجر نالے کا رہائشی تھا۔ جاں بحق افراد کی شناخت 30 سالہ نورین زوجہ شیرا اور 40 سالہ ارشد ولد بشیر کے ناموں سے ہوئی تھی۔
