راولپنڈی: بھارتی فورسز نے ایل او سی پر شہری آبادی کو مارٹر گولوں سے نشانہ بنایا جس کے نتیجے میں 2 خواتین اور بچے سمیت 4 شہری زخمی ہوگئے۔
پاک فوج کے شعبہ تعلقات عامہ (آئی ایس پی آر) کے مطابق بھارتی فورسز کی ایل او سی پر سیز فائر کی خلاف ورزیوں کا سلسلہ جاری ہے، بھارتی فورسز نے لیپا ویلی میں ایل او سی پر شہری آبادی کو مارٹر گولوں سے نشانہ بنایا جس کے نتیجے میں 2 خواتین اور بچے سمیت 4 شہری زخمی ہوگئے۔
آئی ایس پی آر کے مطابق بھارتی فورسز کی جانب سے بھاری ہتھیاروں کا استعمال کیا گیا۔
ترجمان دفتر خارجہ کے مطابق بھارتی سینئر سفارت کار کو دفتر خارجہ طلب کرکے سیز فائر کی خلاف ورزی پر احتجاج ریکارڈ کرایا گیا۔
مزید پڑھیں: بھارتی فوج کی ایل او سی پر اشتعال انگیزی، 45 سالہ شہری زخمی
ترجمان دفتر خارجہ عائشہ فاروقی کا کہنا تھا کہ بھارت مسلسل ایل او سی کی خلاف ورزیاں کررہا ہے، بھارتی فورسز کی فائرنگ سے چار شہری زخمی ہوئے جن میں 2 خواتین اور ایک بچہ شامل ہے۔
ترجمان دفتر خارجہ کا کہنا تھا کہ پاکستان شہری آبادی کو نشانہ بنانے کی شدید مذمت کرتا ہے، بھارت 2003 کے فائر بندی معاہدے کا احترام کرے۔
واضح رہے کہ یکم فروری کو بھارتی فوج نے ایل او سی پر سیز فائر کی خلاف ورزی کرتے ہوئے شہری آبادی کو نشانہ بنایا تھا جس کے نتیجے میں 45 سالہ شخص زخمی ہوگیا تھا۔
