کراچی: وقت بھی کیا کیا رنگ دکھاتا ہے، ملزمان نے کھبی سوچا بھی نہ ہوگا کہ جہاں ڈکیتی کی واردات کی، اسی ادارے کی ایمبولینس میں اسپتال جائیں گے۔
تفصیلات کے مطابق سٹی کورٹ میں آج بالکونی گرنے کا واقعہ پیش آیا، جس کے نتیجے میں پیشی پر آئے تین ملزمان زخمی ہوئے۔
واقعے سے متعلق پولیس نے بتایا کہ بالکونی گرنے کا واقعہ سٹی کورٹ ساؤتھ کی عمارت میں پیش آیا، حادثے میں پیشی پر آئے تین ملزمان زخمی ہوئے، جنہیں طبی امداد کے لئے سول اسپتال منتقل کردیا گیا ہے۔
پولیس حکام نے حیران کن انکشاف کیا کہ بالکونی گرنے سے جو ملزمان زخمی ہوئے وہ ایدھی ہوم میٹھادر ڈکیتی کیس میں نامزد ہیں، زخمی ملزمان میں عمیر، سلیم اور جان اختر شامل ہیں۔
تینوں ملزمان نے دوہزار چودہ میں ایدھی ہوم میٹھادر میں کروڑوں روپےکی ڈکیتی کی تھی اور آج سٹی کورٹ میں پیش آنے والے واقعے کے بعد انہیں ایدھی کی ایمبولینس کے زریعے ہی طبی امداد کے لئے سول اسپتال منتقل کیا گیا، جہاں انہیں طبی امداد دی جارہی ہے۔
پولیس کے مطابق حادثے کے باعث نیچے کھڑی گاڑی کو بھی نقصان پہنچا۔
یاد رہے کہ سال دو ہزار چودہ میں کراچی کے علاقے میٹھادر میں مسلح افراد معروف سماجی کارکن مرحوم عبدالستار ایدھی کو یرغمال بنا کر دو کروڑ روپے نقد اور 5 کلو سونا لوٹ کر فرار ہوگئے تھے۔
