کراچی : ایف پی سی سی آئی نے انٹرنیٹ سروس کی سست روی پر ردعمل دیتے ہوئے کہا کہ عجلت میں نافذ کیے گئے قومی فائر وال کے تباہ کن اثرات ہوں گے۔
تفصیلات کے مطابق ایف پی سی سی آئی بھی انٹرنیٹ سروس کی سست روی کے خلاف میدان میں آ گئی۔
ایف پی سی سی آئی آئی ٹی کمیٹی کنوینر خوشنود آفتاب نے کہا کہ عجلت میں نافذ کیے گئے قومی فائر وال کے تباہ کن اثرات ہوں گے۔
خوشنود آفتاب نے بتایا کہ مالی نقصانات پہلے ہی 30 کروڑ ڈالر تک بڑھ چکے ہیں، 30 کروڑ ڈالر سے بھی زیادہ نقصان کے امکانات کے ساتھ، صورت حال سنگین ہے۔
انھوں نے مزید کہا کہ پاکستان کی آئی ٹی انڈسٹری میں بہتری انا شروع ہوئی تھی، اب شدید آپریشنل رکاوٹوں کی وجہ سے تباہی کے دہانے پر جا رہی ہے، انتہائی سست یا غیر موجود انٹرنیٹ کنیکٹیویٹی کا سامنا ہے ، یہ آئی ٹی صنعت کی بقا پر براہ راست اور جارحانہ حملہ ہیں۔
ان کا کہنا تھا کہ حکومت کی جانب سے شفافیت کی کمی اور آئی ٹی انڈسٹری سے مشاورت کرنے میں ناکامی کی مذمت کرتے ہیں ، بین الاقوامی کلائنٹس پر پاکستانی آئی ٹی انڈسٹری سوالیہ نشان اور عدم اعتماد پیدا کر دیا ہے ، جس سے عالمی ٹیکنالوجی کے مرکز کے طور پر پاکستان کی حیثیت کو ناقابل تلافی نقصان پہنچے گا۔
ایف پی سی سی آئی نے پی ٹی اے اور وزارت انفارمیشن ٹیکنالوجی اینڈ ٹیلی کام سے معاملات درست کرنے کا مطالبہ کرتے ہوئے کہا آئی ٹی کی صنعت پر تباہ کن اثرات سے بچنے کے لیے انٹرنیٹ سروس مکمل بحال کے لیے فوری کارروائی کریں۔
آئی ٹی بحران سے نمٹنے کے لیے ایک مشترکہ کمیٹی کی تشکیل کا بھی مطالبہ کر دیا اور کہا کہ کمیٹی میں آئی ٹی انڈسٹری کے نمائندے، کاروباری رہنما، اور متعلقہ حکومتی اسٹیک ہولڈرز شامل ہوں تاکہ مشترکہ طور پر سائبر سیکیورٹی فریم ورک تیار کیا جا سکے
ان کا کہنا تھا کہ آئی ٹی انڈسٹری کے بحرام نے بین الاقوامی کلائنٹس میں گہرا عدم اعتماد پیدا کر دیا ہے اور بین الاقوامی کلائنٹس اب اپنے ڈیٹا کی حفاظت سے خوفزدہ ہیں، بے اعتمادی کی فضا سےپاکستان سے آئی ٹی کمپنیوں کے بڑے پیمانے پر اخراج کا خطرہ ہے،
