فرانس کے صدر امانویل ماکروں نے اسرائیلی وزیراعظم نیتن یاہو پر زور دیا کہ وہ لبنان میں اسرائیل اور حزب اللہ کے درمیان بڑھتی کشیدگی کو روکنے میں اپنا کردار ادا کریں۔
بین الاقوامی خبر رساں ادارے کی رپورٹ کے مطابق فرانسیسی ایوانِ صدر کا کہنا تھا کہ ٹیلیفون رابطے میں فرانسیسی صدر نے حزب اللہ اور اسرائیل کے درمیان بڑھتی ہوئی کشیدگی پر اپنی شدید تشویش کا اعادہ کیا اور جنگی اشتعال کو روکنے کی ضرورت پر زور دیا۔
فرانسیسی صدر نے غزہ تنازعہ ختم کرنے کے لیے تمام فریقین کو تیزی سے سفارتی حل کی طرف بڑھنے کی فوری ضرورت پر بھی زور دیا۔
فرانسیسی صدارتی محل کے مطابق فرانسیسی صدر نے اسرائیلی وزیر اعظم سے رفح یا خان یونس کے قریب غزہ میں کسی بھی نئی کارروائی سے گریز کرنے کا بھی مطالبہ کیا جس سے صرف بے گناہ انسانی زندگیوں کا ضیاع اور بحرانی صورتِ حال میں اضافہ ہوگا۔
اسرائیل کی بے گھر فلسطینیوں پر بمباری، 30 سے زائد شہید
واضح رہے کہ اسرائیلی فوج نے گزشتہ روز فلسطینیوں کو مصری سرحد کے ساتھ خان یونس اور رفح کے مشرق میں واقع بیشتر علاقوں کو خالی کرنے کا حکم دیا تھا۔ جس کے بعد بے گھر فلسطینیوں کی بڑی تعداد نے ایک بار پھر نقل مکانی شروع کردی ہے۔
