پیرس: فرانس نے افریقی ملک چاڈ سے اپنی فوج کے انخلا کا آغاز 2 جنگی طیاروں کی روانگی کے ساتھ شروع کر دیا ہے، جو کہ دارالحکومت انجامینا میں تعینات تھے۔
غیر ملکی میڈیا رپورٹس کے مطابق افریقی ملک چاڈ کی جانب سے فرانس کو 31 جنوری 2025 تک اپنی فوجیں واپس بلوانے کے الٹی میٹم کے بعد فرانسیسی افواج نے انخلا شروع کر دیا ہے۔
روئٹرز کے مطابق 28 نومبر کو چاڈ نے ایک حیران کن اقدام کرتے ہوئے پیرس کے ساتھ دفاعی تعاون کا معاہدہ ختم کر دیا ہے، چاڈ کی حکومت خطے میں اسلام پسند عسکریت پسندوں کے خلاف جنگ میں مغرب کا اتحادی ہے۔
ابھی کچھ تفصیلات پر اتفاق ہونا باقی ہے کہ انخلا کی شرائط و ضوابط کیا ہوں گی اور کیا کوئی فرانسیسی فوجی وسطی افریقی ملک میں مکمل طور پر رہے گا یا نہیں، تاہم منگل کو پہلے میراج جنگی طیارے مشرقی فرانس میں اپنے اڈے پر واپس لوٹ گئے ہیں، فوج کے ترجمان کرنل گیلوم ورنیٹ نے کہا کہ یہ انجامینا میں تعینات فرانسیسی ساز و سامان کی واپسی کا آغاز ہے۔
شامی رہنما احمد الشرع کی گرفتاری پر 10 ملین ڈالر کا انعام ختم
غیر ملکی میڈیا رپورٹس کے مطابق چاڈ خطے میں دہشت گردی کا گڑھ رہا ہے، جہاں فرانس نے اپنے فوجی تعینات کر رکھے تھے، چاڈ میں ایک ہزار فرانسیسی فوجی تعینات تھے۔
فرانس پہلے ہی فوجی بغاوتوں اور فرانس مخالف جذبات پھیلنے کے بعد مالی، برکینا فاسو اور نائجر سے اپنے فوجیوں کو نکال چکا ہے، چاڈ سے نکلنے سے ساحل کے علاقے میں فرانسیسی فوج کی کئی دہائیوں کی موجودگی ختم ہو جائے گی اور وہاں عسکریت پسندوں کے خلاف براہ راست فرانسیسی فوجی کارروائیاں ختم ہو جائیں گی۔
