لاہور: ہائر ایجوکیشن کمیشن کے نام پر ہیکرز نے ڈگری کی تصدیق کے لیے لوگوں کو لوٹ لیا، فراڈ کے اس کیس میں رابطہ نمبروں پر میسج کر کے رقوم منگوائی گئیں۔
تفصیلات کے مطابق منصورہ لاہور کی رہائشی خاتون لیکچرر کو نامعلوم نمبر سے کال موصول ہوئی کہ آپ کی آن لائن ڈگری تصدیق کرنی ہے، لیکچرر نے کال ڈراپ کر دی، لیکن میسج دیکھنے پر ان کا واٹس ایپ نمبر ہیک کر لیا گیا۔
ہیکرز نے مبینہ طور پر مختلف لوگوں سے لیکچرر کے نمبر سے میسج بھیج کر رقم بھجوانے کا مطالبہ کیا، کئی لوگوں نے پیسے بھجوا دیے، جب کہ کچھ ہمسائے لیکچرر کے گھر بھی رقم لے کر پہنچ گئے۔ رات دیر تک رابطہ نمبروں پر لوگوں کو میسیجز جاتے رہے، کچھ نے رقوم جمع بھی کروا دیں۔
اب متاثرہ خاتون لیکچرر نے شوہر کے ذریعے ایف آئی اے میں درخواست دے دی ہے، اور اپنے ویڈیو بیان میں کہا ہے کہ وزیر اعظم شہباز شریف اور وزیر اعلیٰ مریم نواز واقعے کا نوٹس لیں، خاتون لیکچرر نے فراڈ سے وصول کی گئی رقوم واپس کروانے کا مطالبہ بھی کیا۔
