فیصل آباد : سرکاری تعلیمی اداروں کے طلبہ کے لئے مفت فراہم کی جانے والی سینکڑوں کتب چند ہزار روپے میں ردی میں فروخت کر دی گئیں۔
تفصیلات کے مطابق فیصل آباد میں سرکاری اسکولز اور کالجز کے طلبہ کے لئے پنجاب حکومت کی طرف سے مفت فراہم کی گئی سینکڑوں نئی کتابیں مبینہ طور پر اساتذہ کی ملی بھگت سے چھ ہزار سات سو روپے میں ردی کے بھاؤ فروخت کر دی گئیں۔
اے آر وائی نیوز کے رپورٹر کے مطابق نئی کتابوں کی نو بوریاں امین پور بنگلہ کے کباڑیے طاہر کو محض سات ہزار سات روپے میں فروخت کی گئیں، فروخت کی گئیں کتابیں اب بھی دکان میں موجود ہیں۔
دوسری جانب حکومت پنجاب کی طرف سے چنیوٹ کی تحصیل بھوانہ کے سرکاری اسکولوں کے طلبہ کے لئے مہیا کی گئی پنجاب ٹیکسٹ بک بورڈ کی نئے سال کی کتابوں کی نو بوریاں سرکاری اسکولز کے اساتذہ کی مبینہ ملی بھگت سے مقامی کتب فروش صدیق نے صرف چھ ہزار سات سو روپے میں اسماعیل کباڑیے کو فروخت کیں۔
جب کہ اسماعیل نے پہلی جماعت سے بارہویں جماعت تک کی یہ کتابیں امین پور بنگلہ کے کباڑیے محمد طاہر کو سات ہزار روپے میں فروخت کر دیں، محکمہ تعلیم کی طرف سے ذمہ دار اساتذہ اور کتاب فروش کے خلاف ابھی تک کسی قسم کی کارروائی نہیں کی گئی۔
