برازیلیا: برازیل کے صدر جیر بولسنارو کا کہنا ہے کہ حکومت ملک کے تمام شہریوں کو مفت کرونا وائرس ویکسین فراہم کرے گی، سنہ 2021 کے آغاز میں برازیل میں کرونا وائرس ویکسین کی 15 ملین خوراکوں کی پہلی کھیپ پہنچ جائیں گی۔
مقامی میڈیا کے مطابق برازیل کے صدر نے اعلان کیا ہے کہ برازیل میں لوگ کرونا وائرس سے بچاؤ کی ویکسین کے مفت ٹیکے لگا سکیں گے۔
ایک روز قبل صدر نے سماجی رابطے کی ویب سائٹ ٹویٹر پر لکھا کہ سائنسی ہدایات اور قانونی اصولوں پر عمل آوری کے ساتھ اگر قومی سینیٹری نگرانی ایجنسی اس کی اجازت دے تو برازیل کی حکومت پوری آبادی کو مفت میں کرونا وائرس ویکسین فراہم کرے گی۔
رواں ماہ کے شروع میں برازیل کے محکمہ صحت نے اعلان کیا تھا کہ سنہ 2021 کے ابتدائی 2 مہینوں میں برازیل کو آکسفورڈ یونیورسٹی اور ایسٹرا زینیکا کرونا وائرس ویکسین کی 15 ملین خوراکوں کی پہلی کھیپ ملنے جارہی ہے۔
حکام کے مطابق توقع ہے کہ اگلے برس کی پہلی ششماہی میں برازیل میں کل 100 ملین خوراکیں پہنچ جائیں گی۔
برازیل کے وزیر صحت ایڈورڈو پازیلو کے مطابق سنہ 2021 کے دوسرے نصف میں ویکسین کی مزید 160 ملین خوراکیں برازیل میں تیار کی جائیں گی۔
خیال رہے کہ برازیل اس وقت کرونا وائرس کیسز اور اموات کے حوالے سے دنیا بھر میں تیسرے نمبر پر ہے،
برازیل میں رپورٹ ہونے والے کرونا وائرس کیسز کی مجموعی تعداد 66 لاکھ 75 ہزار سے زائد اور فعال کیسز کی تعداد 6 لاکھ 43 ہزار 22 ہوچکی ہے۔
ملک میں ہلاکتوں کی تعداد 1 لاکھ 78 ہزار 184 جبکہ صحت یاب مریضوں کی تعداد 58 لاکھ 54 ہزار 709 ہوچکی ہے۔
