لاہور : عدالت نے حکومت کو مفت آٹا تقسیم کرنے کی تشہیر سے روک دیا ہے، عدالت کا کہنا ہے کہ اشیاخور و نوش کی تقسیم میڈیا پر پبلک نہیں ہونی چاہیے۔
تفصیلات کے مطابق لاہورہائی کورٹ میں آٹے کی تقسیم کے دوران ہلاکتوں اور تقسیم کے طریقہ کار کے خلاف درخواست کی سماعت ہوئی۔
بعد ازاں عدالت نے مفت آٹے کی تقسیم کی تشہیر روکنے کیلئے دائر درخواست کا تحریری حکم جاری کردیا جس میں کہا گیا ہے کہ آرٹیکل 14انسانی عزت و تکریم کی بات کرتا ہے۔
تحریری حکم میں کہا گیا ہے کہ اشیائے خورد و نوش کی فراہمی کے دوران آئین کی خلاف ورزی نہیں ہونی چاہیے، لائنوں میں کھڑا کرکے اشیاء خورد و نوش فراہم کرنا عزت نفس مجروح کرنے کےمترادف ہے۔
لاہور ہائی کورٹ کے مطابق اس تقسیم کو میڈیا پر نشر کرنا جلتی پر تیل کے مترادف ہے، حکومتی فنڈ سے حکومتی کارکردگی کی تشہیر کرنا کرپٹ پریکٹس اور بددیانتی ہے، قرآن کریم بھی خیرات کی تقسیم سےمتعلق ذاتی تشہیر سےروکتا ہے۔
تحریری حکم میں قرآنی آیات کو بھی عدالتی حکم کا حصہ بنایا گیا ہے، عدالت نے ہدایت کی کہ اشیاخورونوش کی تقسیم میڈیا پر پبلک نہیں ہونی چاہیے، ایسی تقسیم جس میں انسانی عزت ونفس مجروح ہو اسے روکا جائے۔
سرکاری وکیل کے مطابق پنجاب میں بینظیر انکم سپورٹ کےعلاوہ 12.3ملین مستحق خاندانوں کی نشاندہی کی گئی ہے، پنجاب حکومت ان مستحق خاندانوں کو ڈائریکٹ سبسڈی دے گی۔
