ریاض : سعودی پولیس نے ایک شہری کو گرفتار کیا ہے جس پر الزام ہے کہ اس نے اپنی گاڑی میں ایک پیٹرول پمپ سے ٹنکی فل کروائی اور بغیر پیسے دیئے فرار ہوگیا۔
اس حوالے سے ابہا بولیس نے میڈیا کو مطلع کیا ہے کہ گاڑی میں پٹرول ڈلوانے کے بعد پیسے دیئے بغیر پمپ سے فرار ہونے والے شہری کو گرفتار کر لیا گیا ہے۔
سعودی ذرائع ابلاغ کے مطابق وزارت داخلہ کے اسنیپ چیٹ اکاؤنٹ میں کہا گیا ہے کہ ایک شہری نے ابہا کے ایک پٹرول پمپ سے گاڑی میں تیل ڈلوایا تھا اور جب مطلوبہ رقم دینے کی باری آئی تو اس نے کارکن کو چھری دکھائی اور دھمکی دیتے ہوئے موقع سے فرار ہوگیا۔
اس سسلے میں ابہا پولیس کا کہنا ہے کہ اطلاع ملتے ہی مذکورہ پٹرول پمپ کے سی سی ٹی وی کیمرے کی مدد سے مفرور شہری کی فوری طور پر شناخت کرلی گئی اور بعد ازاں ریکارڈ وقت میں اسے گرفتار کرلیا گیا۔
پولیس کا کہنا ہے کہ اس وقت ملزم سے مزید تفتیش کی جارہی ہے۔ لوگوں کی سلامتی کے لیے خطرہ بننے کے علاوہ چوری کے الزام میں اسے پبلک پراسیکیوٹر کے سامنے پیش کیا جائے گا۔
