The news is by your side.

Advertisement

دلخراش واقعہ: سکھر میں کمسن بچے مال گاڑی کی زد میں آگئے

سکھر: سکھر ریلوے کی حدود میں دلخراش واقعہ رونما ہوا ہے، جہاں ریلوے لائن کے قریب مویشی چرانے والے بچے مال گاڑی کی زد میں آگئے۔

ریلوے پولیس ذرائع کے مطابق واقعہ روہڑی اور پنوعاقل کے درمیان منڈو دیرو اسٹیشن کے قریب اس وقت پیش آیا جب مویشی چرانے والے چاروں بچے ایک مسافر گاڑی جوکہ کراچی سے لاہور جا رہی تھی، اسے پٹری پر بیٹھ کر دیکھ رہے تھے کہ عین اسی وقت دوسرے ٹریک پر مال گاڑی آگئی، جس کی زد میں آکر بچوں کے ساتھ یہ واقعہ رونما ہوا۔

ریلوے پولیس ذرائع کے مطابق افسوسناک واقعے میں دو بچے موقع پر ہی جاں بحق جبکہ دو شدید زخمی ہوئے، جاں بحق بچوں کی شناخت 14 سالہ عبدالحمید جبکہ 12 سالہ فتح محمد کے نام سے ہوئی، جاں بحق دونوں بچے سگے بھائی بھی تھے جبکہ زخمیوں میں ثناء اللہ اور امام اللہ چوہان شامل ہیں۔

واقعے کی اطلاع ملنے پر امدادی ٹیمیں جائے حادثے پر پہنچی اور جاں بحق بچوں کی لاشوں اور زخمیوں کو اسپتال منتقل کیا، ننھے بچوں کے جاں بحق ہونے کی اطلاع گھر والوں کو دی گئی تو اہل خانہ غم سے نڈھال ہوگئے اور دھاڑیں مار مار کر رونے لگے۔

واقعے کے بعد کچھ دیر تک اپ اینڈ ڈاؤن ٹریک پر ٹرینوں کی آمدروفت معطل ہوئی، ریلوے عملے نے ضروری اقدامات کے بعد ٹرینوں کی آمدورفت کو بحال کردیا۔

Comments

یہ بھی پڑھیں