اسلام آباد: پی آئی اے طیارہ حادثے کی تحقیقات کے لیے فرانس کی چار رکنی ٹیم پاکستان پہنچ گئی۔
طیارہ حادثے کی تحقیقات میں تیزی آگئی۔ فرانس کی خصوصی ٹیم پاکستان پہنچ گئی۔
چار رکنی تحقیقاتی ٹیم میں انجن بنانے والے پی ڈبلیو کے دو ارکان اور دو ارکان اے ٹی آر بنانے والی کمپنی کے شامل ہیں جنہیں ایس آئی بی کی جانب سے بریفنگ اور طیارے کے تمام ریکارڈز سےمتعلق آگاہ کیا گیا۔
ٹیم میں اے ٹی آر طیارے بنانے والی فرانسیسی کمپنی کے ماہرین بھی شامل ہیں۔ ماہرین کی ٹیم جہاز میں دوران پرواز ممکنہ فنی خرابی سمیت دیگر عوامل کے حوالے سے تحقیقات کرے گی۔
واضح رہے کہ 7 دسمبر کی شام چترال سے اسلام آباد آنے والی پی آئی اے کی پرواز پی کے 661 حویلیاں کے نزدیک حادثے کاشکار ہوگئی تھی۔ جہاز میں عملے سمیت 47 افراد سوار تھے۔
حادثے میں معروف نعت خواں اور اے آر وائی کے ٹی وی میزبان جنید جمشید بھی اپنی اہلیہ سمیت جاں بحق ہوگئے تھے۔
اب تک حادثے میں شہید ہونے والے کئی افراد کی تدفین کی جاچکی ہے، بقیہ افراد کی شناخت کاعمل ڈی این کے ذریعے جاری ہے۔ حادثے کے بعد پی آئی اے کے چیئرمین بھی مستعفی ہو چکے ہیں۔
