خواتین کا حشرات الارض سے خوفزدہ ہونا کوئی انہونی بات نہیں لیکن ایک ڈرپوک خاتون نے تو مکڑی کو بھگانے کیلیے پولیس کو طلب کرلیا۔
دنیا میں ایسی خواتین کی کمی نہیں جن کی بہادری کی مثالیں دی جاتی ہیں لیکن یہی دنیا ایسی ڈرپوک عورتوں سے بھی بھری پڑی ہے جو ایک چھپکلی، لال بیگ، مکڑی یا اس جیسا کوئی چھوٹا حشرات الارض دیکھ کر خوف کے مارے چیخ چیخ کر آسمان سر پر اٹھالیتی ہیں لیکن برطانیہ کی ایک خاتون نے تو حد ہی کردی اور گھر میں موجود مکڑی کو بھگانے کے لیے پولیس کو ہی طلب کرلیا۔
غیر ملکی میڈیا کے مطابق برطانیہ کی ویسٹ یارکشائر پولیس نے سماجی رابطوں کی ویب سائٹ ٹوئٹر پر خاتون کی ایک آڈیو شیئر کی ہے جس میں وہ پولیس کو طلب کررہی ہیں لیکن ایسا نہیں ہے کہ ان کے گھر میں کوئی چور یا ڈاکو گھس آئے ہوں جن سے نمٹنے کیلیے انہوں نے پولیس کو بلایا بلکہ ایک مکڑی نے انہیں یہ انتہائی اقدام کرنے پر مجبور کیا۔
اس آڈیو میں سنا جاسکتا ہے کہ مذکورہ خاتون نے ایمرجنسی نمبر پر فون کیا اور کہا کہ ‘میری گھر میں ایک بڑی مکڑی گھس آئی ہے جسے نکالنے کیلئے فوری کسی کو میرے گھر روانہ کریں’ خاتون نے مزید کہا کہ ‘آپ شاید مجھے پاگل سمجھیں گے لیکن میں نے ہر کسی کو مدد کیلئے پکارا، کوئی نہ آیا، اب آپ میری آخری امید ہیں’۔
فون آپریٹر نے خاتون کو مایوس کرتے ہوئے جواب دیا کہ ‘ بدقسمتی سے ایک مکڑی کو گھر سے نکالنے کیلئے پولیس ان کے گھر نہیں آسکتی’۔
یہ جواب سن کر خاتون کا کیا ردعمل تھا یہ تو پولیس نے نہیں بتایا تاہم شیئر کی گئی آڈیو کے ساتھ پولیس نے یہ کیپشن دیا کہ پولیس کی ایمرجنسی ہیلپ لائن 999 پر موصول ہونے والی فضول فون کالز میں سے یہ ایک ہے اور روزانہ تقریباً 120 ایسی فون کالز موصول ہوتی ہیں جو پولیس کا وقت ضائع کرتی ہیں۔
پولیس نے شہریوں سے اپیل کی کہ 999 پر صرف اس صورت میں کال کریں جب آپ کی زندگی حقیقت میں خطرے میں یا آپ کے سامنے کوئی جرم سرزد ہورہا ہو۔
ٹوئٹر پر شیئر کی گئی یہ آڈیو دیکھتے ہی دیکھتے وائرل ہوگئی اور کئی سوشل میڈیا صارفین نے پولیس کا وقت ضائع کرنے کی پاداش میں خاتون پر جرمانہ عائد کرنے کا مطالبہ کردیا۔
Please don't ring 999 if there's a spider in your house.
This is just one example of an inappropriate call that we've had to our 999 emergency line.
On average, we receive 120 calls a day to our 999 line that are not a life or death emergency.
One is too many.@WYP_Contact pic.twitter.com/ykzwmRhvGR
— West Yorkshire Police (@WestYorksPolice) July 4, 2022
