جی ڈی اے کی رکن قومی اسمبلی سائرہ بانو کا کہنا ہے حکمران کہتے ہیں کہ پیٹرولیم مصنوعات کی قیمتوں میں اضافے کا دفاع نہیں کرسکتے، ان لوگوں نے کبھی اپنی جیب سے گاڑیوں میں فیول نہیں ڈلوایا۔
اے آر وائی نیوز کے پروگرام آف دی ریکارڈ میں میزبان کاشف عباسی سے گفتگو کرتے ہوئے انہوں نے کہا کہ ان لوگوں نے کبھی اپنی گاڑیوں میں اپنی جیب سے فیول نہیں ڈلوایا انہیں عوام کی مشکلات کا کیسے احساس ہوگا۔ ان سے ویگو گاڑیاں واپس لیں، پیٹرول کے پیسے بھی ان سے واپس لیں۔
سائرہ بانو نے کہا کہ یہ لوگ حکومت میں بیٹھے ہی کیوں ہیں، انہوں نے اپنے مفاد کی تمام قانون سازیاں مکمل کرلیں اور اوورسیز پاکستانیوں کو ان کے ووٹ کے حق سے محروم کردیا گیا۔
’’جنہوں نے کبھی اپنے پیسوں سے پیٹرول نہ بھروایا ہو انہیں کیسے احساس ہوگا‘‘، رہنما جی ڈی اے سائرہ بانو کی حکومت پر کڑی تنقید#ARYNews #OffTheRecord pic.twitter.com/aSE48g5QCj
— ARY NEWS (@ARYNEWSOFFICIAL) August 1, 2023
انہوں نے کہا کہ یہ ہی وہ لوگ تھے جو پیٹرول بم کے فلک شگاف نعرے لگاتے ہوئے مہنگائی مارچ لے کر نکلتے تھے، ایک وہ خاتون بھی تھی جو کہتی تھی کہ رات کی تاریکی میں پیسے بڑھا دیئے جاتے ہیں۔
جی ڈی اے رہنما نے کہا کہ شہبازشریف ہی کہتے تھے کہ میرا نام تبدیل کرلینا اب انہیں کیا کہیں؟ اپنی مراعات میں تو انہوں نے اضافہ کردیا لیکن ان لوگوں کو عوام کی کوئی فکر ہی نہیں۔
رکن قومی اسمبلی کا کہنا تھا کہ یہ لوگ تو نئی آنے والی حکومت کیلئے بھی مشکلات چھوڑ کر جارہے ہیں۔
اس موقع پر پی ٹی آئی سینیٹر ہمایوں مہمند نے کہا کہ یہ لوگ عدالت کے سامنے احتجاج کرتے تھے اب وزیراعظم ہاؤس کے سامنے بھی کریں، گزشتہ حکومت میں مہنگائی مارچ کرنے والے مولانا فضل الرحمان بھی اب تک خاموش ہیں۔
