راولپنڈی : شہید کیپٹن اسامہ کی نماز جنازہ چکلالہ گیریژن پنڈی میں ادا کردی گئی ، وزیر اعظم اور آرمی چیف نے شرکت کرکے شہید کو خراج عقیدت پیش کیا۔
تفصیلات کے مطابق شہید کیپٹن محمد اسامہ کی نمازجنازہ چکلالہ گیریژن راولپنڈی میں ادا کی گئی، وزیراعظم شہبازشریف،آرمی چیف جنرل سیدعا صم منیر،وزیر دفاع خواجہ آصف ، وزیر اطلاعات بھی نمازجنازہ میں شریک ہوئے۔
وزیراعظم اور آرمی چیف نے شہید کے جسد خاکی کو کاندھا دیا ساتھ ہی لواحقین سے تعزیت کا اظہار کیا۔
آئی ایس پی آر نے بتایا حاضر سروس اور ریٹائرڈ فوجی افسران، جوانوں اور شہید کے رشتے داروں نے بھی نمازجنازہ میں شرکت کی۔
چوبیس سالہ شہید کیپٹن کوآبائی علاقے میں مکمل فوجی اعزاز کےساتھ سپرخاک کیا جائے گا۔
اس موقع پر وزیراعظم شہبازشریف نے کہا یہ قربانیاں پرامن اور خوشحال پاکستان کیلئے ہیں، قربانیاں دہشت گردی کو شکست دینے کے ہمارے عزم کی عکاس ہیں۔
ان کا کہنا تھا کہ قوم غیرملکی دہشت گردوں اوران کے سہولت کاروں کیخلاف پرعزم ہے،دشمنوں کومتحدسوچ اوربہترین حکمت عملی سےشکست دی جائے گی۔
یاد رہے پاک فوج کےجوان کیپٹن اسامہ نےشمالی وزیرستان میں بہادری سےلڑتے ہوئے جام شہادت نوش کیا جبکہ آپریشن کے دوران سیکیورٹی فورسزسےفائرنگ کےتبادلےمیں دو دہشت گرد مارے گئے تھے ، شہیدکیپٹن آپریشن کی قیادت کررہے تھے۔
