کراچی: صوبہ سندھ کے دارالحکومت کراچی میں گزشتہ روز ٹیپو سلطان روڈ پر نامعلوم افراد کی فائرنگ سے شہید پولیس اہلکار رحمت کی نماز جنازہ ادا کردی گئی۔ تدفین آبائی علاقے عمر کوٹ میں کی جائے گی۔
تفصیلات کے مطابق فیروز آباد میں گزشتہ روز ٹیپو سلطان روڈ پر دہشت گردوں سے مقابلے میں شہید ہونے والے پولیس اہلکار کی نماز جنازہ ادا کردی گئی۔
نماز جنازہ میں کور کمانڈر کراچی، آئی جی سندھ، ڈی جی رینجرز سندھ، ایڈیشنل آئی جی کراچی اور دیگر اعلیٰ افسران نے شرکت کی۔
پولیس حکام کے مطابق شہید ہونے والا اہلکار رحمت ریٹائرڈ فوجی تھا اور اینٹی اسٹریٹ کرائم فورس ایسٹ زون میں تعینات تھا۔
یاد رہے کہ گزشتہ روز دہشت گرد واقعات میں 3 پولیس اہلکار نشانہ بنے۔
پہلا واقع سپر ہائی وے پر نادرن بائی پاس کے قریب پیش آیا جہاں موٹر سائیکل سوار ملزمان کی فائرنگ سے ایک پولیس اہلکار شہید جبکہ دوسرا زخمی ہوگیا۔
دوسرا واقعہ ٹیپو سلطان روڈ پر پیش آیا جہاں فیروز آباد تھانے کی موبائل کو نشانہ بنایا گیا۔ نامعلوم مسلح ملزمان نے پولیس اہلکار کے سر پر گولیاں ماریں اور کالعدم تنظیم کا پمفلٹ پھینک کر فرار ہوگئے۔
پولیس نے اہلکاروں کی شہادت کے واقعے کی تحقیقات اور ملزمان کی تلاش شروع کردی ہے۔