لاہور: نیوزی لینڈ کے خلاف پہلے میچ میں لاہور کے قذافی اسٹیڈیم میں آل راؤنڈر عماد وسیم کے حق میں نعرے لگ گئے جس کی ویڈیو سوشل میڈیا پر وائرل ہوگئی۔
وائرل ویڈیو میں دیکھا جاسکتا ہے کہ پاکستان کی بولنگ کے وقت عماد وسیم باؤنڈری لائن کے پاس کھڑے فیلڈنگ کررہے تھے کہ اس وقت تماشائیوں نے نعرے لگانا شروع کردیے کہ ‘عماد کو اوور دو’۔
ہوا کچھ یوں کہ نیوزی لینڈ کیخلاف پہلے ٹی ٹوئنٹی میں چودہ اوورز تک آل راونڈ کو کوئی اوور نہیں ملا تو شائقین نے نعرے لگانا شروع کیے۔ عماد پندرہویں اوور میں آئے اور دو گیندوں پر دو وکٹیں لیں۔
ویڈیو میں دیکھا جاسکتا ہے کہ مداحوں کی جانب سے نعرے بازی کرنے پر عماد ان کی جانب پلٹے اور شکریہ ادا کرنے کے انداز میں ہاتھ اٹھایا جبکہ ایک وقت ایسا بھی آیا کہ گراؤنڈ مین مسلسل نعرے لگ رہے تھے جس پر عماد وسیم شائقین کی جانب پلٹے اور ہاتھ جوڑے۔
فخر زمان بھی صائم ایوب کی بیٹنگ کے فین ہوگئے
واضح رہے کہ کئی عرصے بعد قومی ٹیم میں واپسی کرنے والے عماد وسیم نے گزشتہ روز شاندار بولنگ کا مظاہرہ کیا، ان سے محض ایک ہی اوور کروایا گیا جس میں انہوں نے 2 رنز دے کر 2 پے در پے وکٹس حاصل کیں۔
واضح رہے کہ پانچ ٹی ٹوئنٹی میچز کی سیریز کے پہلے میچ میں پاکستان نے نیوزی لینڈ کو 88 رنز سے شکست دی، پاکستان کے 183 رنز کے ہدف کے تعاقب میں کیوی ٹیم 94 رنز پر ڈھیر ہوگئی۔
