حب : گذانی کے شپ بریکنگ یارڈ میں کھڑے ناکارہ جہاز میں خوفناک آتشزدگی نے 7 مزدوروں کو جھلسا دیا، زخمیوں میں تین کی حالت تشویش ناک ہے۔
تفصیلات کے مطابق حب علاقے گڈانی میں واقع شپ یارڈ میں کھڑے ناکارہ جہاز میں اچانک ہولناک آگ بھڑک اٹھی جس کی زد میں آکر کئی مزدور جھلس گئے۔
پولیس ذرائع کا کہنا ہے کہ خوفناک آتشزدگی ناکارہ جہاز میں کے آئل ٹینکر میں کٹنگ کے دوران ہوئی تھی جس نے کام کرنے والے مزدوروں کو بھی اپنی لپیٹ میں لے لیا تھا۔
پولیس افسر نے میڈیا کو بتایا کہ افسوس ناک حادثے میں جھلسنے والے 7 مزدوروں میں سے تین کی حالت تشویش ناک ہے، جبکہ 4 زخمیوں کی حالت خطرے سے باہر ہے۔
گذانی پولیس کا کہنا ہے کہ آتشزدگی میں جھلسنے والے تین مزدوروں کو طبی امداد کے لیے کراچی روانہ کردیا گیا ہے۔
ذرائع کا کہنا ہے کہ حب فائر بریگیڈ کی گاڑیاں ناکارہ جہاز کے آئل ٹینکر میں لگی آگ پر قابو پانے میں مصروف ہیں۔
مزید پڑھیں : گڈانی شپ یارڈ، لنگراندازجہازمیں آتشزدگی، 5 افراد جاں بحق
یاد رہے کہ گزشتہ روز گڈانی شپ بریکنگ یارڈ میں جہاز کی کٹائی کے دوران آگ لگ گئی تھی، جس کے نتیجے میں 5مزدور جھلس کر جاں بحق ہوئے، پانچوں افراد محنت کش تھے۔
خیال رہے کہ ایک ہفتے قبل بھی اسی جہاز میں آگ لگنے کا واقعہ پیش آچکا ہے لیکن خوش قسمتی سےاس حادثےمیں کوئی زخمی یا ہلاک نہیں ہوا تھا۔
واضح رہے کہ یکم نومبر 2016 کو ایک جہاز کے آئل ٹینک میں صفائی کے دوران آگ بھڑک اٹھی تھی، حادثے میں آئل ٹینک کے اندر کام کرنے والے 23 مزدور جاں بحق ہوگئے تھے۔
