پشاور : وزیراعلی خیبر پختونخواہ علی امین گنڈا پور کی سربراہی میں حکومتی کمیٹی کے قومی پشتون جرگے سے مذاکرات کامیاب ہوگئے۔
تفصیلات کے مطابق وزیراعلیٰ کے پی علی امین گنڈاپور کی سربراہی میں حکومتی کمیٹی کے قومی پشتون جرگے سے رات گئے مذاکرات ہوئے۔
ن لیگی ڈپٹی پارلیمانی لیڈر کے پی اسمبلی ملک طارق اعوان نے بتایا مذاکرات کامیاب رہے، قومی پشتون جرگے کو تین دن تک اجتماع کی اجازت ہوگی، جس کیلئے سیکیورٹی فراہم کی جائے گی۔
ان کا کہنا تھا کہ اجتماع کے بعد مذاکرات کا دوسرا دور شروع ہوگا، آئین و قانون کی پاسداری اور پختون روایات کو مقدم رکھنے پر اتفاق ہوا ساتھ ہی آئین و قانون کے دائرے میں اجتماع کی یقین دہانی کروائی گئی ہے۔
ن لیگی ڈپٹی پارلیمانی لیڈر نے کہا کہ مذاکرات میں ریاست مخالف سرگرمی نہ کرنےکی یقین دہانی کرائی گئی ہے جبکہ آئین اور قانون کے خلاف کوئی قدم نہ اٹھانے پر اتفاق کیا گیا۔
ملک طارق اعوان کا کہنا تھا کہ فریقین میں مذاکرات خوشگوار ماحول میں ہوئے، پارلیمانی لیڈران،اسپیکر اور وزیر اعلیٰ کی قیادت میں مذاکرات ہوئے، مذاکرات میں فریقین نے گرم جوشی کامظاہرہ کرتے ہوئے کھل کر اظہار خیال کیا۔
اس موقع پر وزیر اعلیٰ کے پی علی امین گنڈاپور نے کہا وفاقی حکومت اور صوبائی اسمبلی نے مجھ پر اعتماد کیا، مجھ پر جو اعتماد کیا گیا اس کو ٹھیس نہیں پہنچاؤں گا۔
خیال رہے خیبر پختونخوا میں امن و امان کیلئے گرینڈ جرگے نے وزیراعلیٰ علی امین کو مکمل اختیار دیتے ہوئے پی ٹی ایم سے بات کی اجازت دی تھی۔
