کراچی : ساہیوال سے آکر کراچی میں شہریوں کو لوٹنے والے نوسرباز گروہ کو گرفتار کرلیا گیا،ملزمان بینکوں سے کیش نکالنے والوں کو دھوکا دہی سے لوٹتے تھے۔

تفصیلات کے مطابق کراچی میں آرام باغ پولیس کی کارروائی کرتے ہوئے ساہیوال سے آئے 3 رکنی نوسرباز گروہ کو گرفتار کرلیا۔

ملزمان میں وسیم عرف سیما،اشرف عرف اللہ رکھااوررحمان عرف رحمانی شامل ہیں، پولیس نے بتایا کہ ملزمان بینکوں سے کیش نکالنے والوں کو دھوکا دہی سے لوٹتے تھے۔

پولیس کا کہنا تھا کہ گرفتارملزمان سے لوٹا ہوا کیش،اسلحہ، مو بائل فون اور جعلی نمبر پلیٹس برآمد کرلی گئی ہے جبکہ ملزمان سے 2 پستول، 10 گولیاں، 4 موبائل فون اور3 لاکھ 62 ہزار نقدی بھی برآمد ہوئے۔

ملزمان ناظم آباد،آرام باغ،قائد آباد،سہراب گوٹھ میں وارداتیں کرچکے ہیں جبکہ نوسربازوں کاگروپ گوجرانوالہ،گجرات،میاں چنوں، سر گو دھا ، راولپنڈی میں وارداتیں کرچکا ہے۔

ملزمان گاڑی میں وارداتیں کرتے ہیں اور ہر دفعہ نئی نمبرپیٹ استعمال کرتے ہیں، گرفتارملزمان سے پانچ جوڑی مختلف بوگس نمبر پلیٹس بھی برآمد ہوئیں۔

ملزمان کا سندھ ڈیٹا بیس میں ریکارڈ نہیں، یہ پنجاب کےمختلف شہروں میں جیل کاٹ چکے ہیں۔