اسلام آباد: صوبہ پنجاب کے شہر راولپنڈی میں ایک گھر میں گیس لیکج کے باعث دھماکا ہوگیا جس سے گھر کے 2 افراد جھلس کر زخمی ہوگئے۔
تفصیلات کے مطابق راولپنڈی کے علاقے ڈھوک سیداں میں گھر میں گیس لیکج سے زوردار دھماکا ہوا جس سے 2 افراد جھلس گئے۔
ریسکیو ٹیموں نے متاثرہ افراد کوابتدائی طبی امداد دے کر اسپتال منتقل کر دیا۔
ریسکیو ذرائع کے مطابق گھر کے افراد رات کو گیس کا چولہا جلا کر سوئے تھے تاہم رات میں کسی وقت گیس سپلائی منقطع ہوگئی۔
ریسکیو ذرائع کا مزید کہنا ہے کہ جب گیس کی فراہمی دوبارہ شروع ہوئی تو گیس لیکج شروع ہو گئی، بجلی کا بٹن آن کرنے کے ساتھ ہی گھر میں دھماکا ہوگیا۔
خیال رہے کہ چند روز قبل کراچی کے علاقے سرجانی ٹاؤن میں ایک پل کے نیچے واقع گیس سلنڈر کی دکان میں دھماکا ہوا تھا۔
دھماکے کے وقت گرین لائن بس بالائی گزر گاہ سے گزر رہی تھی جو بال بال بچ گئی، دھماکے میں کچھ گاڑیوں کو نقصان پہنچا تھا۔
