گیس لیکیج کے باعث گھر میں سوئی ہوئی ماں اور اس کے چار کمسن بچے ابدی نیند سو گئے پولیس نے تحقیقات شروع کر دیں۔
یہ افسوسناک واقعہ مصر میں پیش آیا جہاں الفیوم گورنریٹ میں ماں اور اس کے چار کمسن بچوں کی لاشیں ایک فلیٹ کے بیڈ روم میں پائی گئیں۔
العربیہ کے مطابق پولیس کو اہل علاقہ نے اطلاع دی کہ ایک فلیٹ سے گیس کی شدید بو آ رہی ہے۔ پولیس جب جائے وقوعہ پر پہنچی تو گھر کے بیڈ روم میں ماں اور چار بچے موجود تھے جو سب انتقال کر چکے تھے۔
ابتدائی تحقیقات کے مطابق پانچوں کی موت گیس لیکیج میں دم گھٹنے کے باعث ہوئی ہے۔
پبلک پراسیکیوشن نے موت کے اسباب کے درست تعین کے لیے لاشوں کے معائنے اور فرانزک ٹیسٹ کا حکم دیا ہے اور واقعہ کی تحقیقات کے لیے تحقیقاتی ٹیم بنانے کی بھی ہدایت کی ہے۔
