اسلام آباد : وفاقی حکومت نے سردیوں کی آمد سے قبل عوام کو بڑے خدشے سے خبردار کردیا، اب دن میں تین بار گیس کی لوڈشیدنگ ہوگی۔
سینیٹ کے ہونے والے اجلاس سے وفاقی وزیر توانائی حماد اظہر نے خطاب کرتے ہوئے آگاہ کیا کہ سردیوں کے موسم میں گھریلو صارفین کیلئے ایک دن میں 3مرتبہ گیس فراہم کی جائے گی۔
انہوں نے کہا کہ صبح کے ناشتے، دوپہر کے کھانے اور رات کے کھانے کے وقت گیس دستیاب ہوگی، ہفتے میں 3 دن گیس فراہمی کی اگر خبر ہے تو وہ درست نہیں۔
حماد اظہر نے کہا کہ روس کے ساتھ گیس پائپ لائن کے حوالے سے معاملات مزید پیش رفت ہورہی ہے، روس کا ایک وفد چند دن قبل مذاکرات کے بعد پاکستان سے واپس گیا ہے۔
وفاقی وزیر نے بتایا کہ مذاکرات کے نئے دور کیلئے2سے3روز میں روس کا وفد دوبارہ واپس آئے گا، ایل این جی، پی ایل ایل بورڈ کےذریعے خریدا جاتا ہے۔
حماداظہر کا کہنا تھا کہ ایک یا دو کارگوز کی خریداری پی ایس او بورڈ کے ذریعے ہوتی ہے، اور بورڈ کی منظوری کے بغیر کوئی خریداری نہیں ہوتی، نومبر اور دسمبر کیلئے11اور کارگوز لئے ہیں۔
وفاقی وزیر نے بتایا کہ آج پاکستان میں28فیصد گھرانوں کو گیس ملتی ہے،70فیصد سے زائد گھرانوں کو آج بھی گیس کی فراہمی نہیں ہوپاتی، گیس بحران کا تعلق ایل این جی سے نہیں ہے۔
وزیرتوانائی کا کہنا تھا کہ گھریلو صارفین کو ترجیحی بنیادوں پر گیس کی فراہمی کی جاتی ہے، کوشش کر رہے ہیں گھریلو صارفین اور صنعتی اداروں دونوں سیکٹرز کو گیس کی فراہمی ہو۔
ان کا مزید کہنا تھا کہ سوئی گیس سیکٹر میں نقصانات کی شرح11فیصد کے قریب رہ گئی ہے، اوگرا شرائط کے مطابق صرف ایک فیصد نقصانات باقی ہیں۔
