سابق ہندوستانی اوپننگ بلے باز گوتم گمبھیر نے امریکا اور ویسٹ انڈیز میں شیڈول آئی سی سی ٹی 20 ورلڈ کپ 2024 کے فائنل میں ہندوستان اور پاکستان کو آمنے سامنے دیکھنے کی خواہش ظاہر کی ہے۔
ایک حالیہ انٹرویو میں گمبھیر نے کہا کہ آئی سی سی ٹی 20 ورلڈ کپ 2024 میں ہندوستان اور پاکستان ایک دوسرے کے خلاف مقابلہ کریں گے، اور وہ فائنل کے لیے کوالیفائی بھی کر سکتے ہیں۔
گوتم گمبھیر نے کہا کہ ایسا نہیں ہونا چاہیے کہ اگر پاکستان کسی ٹیم کے خلاف ہار جاتا ہے تو ہندوستان میں حامی جشن منانے کے موڈ میں ہوں، یا ہندوستان کے ناکام ہونے پر پاکستانی شائقین جشن منانے کے لیے تیار ہوں۔
ان کا کہنا تھا کہ کسی اور کی شکست کا جشن منانا بے معنی ہے جب پاکستان ہارتا ہے تو ہندوستانی شائقین اس سے لطف اندوز ہوتے ہیں اور جب ہندوستان کوئی مقابلہ جیتنے میں ناکام ہوتا ہے تو پاکستان میں بھی ایسا ہی ہوتا ہے یہ ایک منفی رویہ ہے اس ذہنیت کو بدلنے کا وقت آگیا ہے۔
2024 مینز ٹی 20 ورلڈ کپ 4 سے 30 جون تک کیریبین اور امریکہ میں منعقد ہونے والا ہے، یہ پہلی بار ہو گا کہ امریکہ کسی بین الاقوامی کرکٹ ایونٹ کی میزبانی کرے گا۔
