گوادر : بلوچستان کے شہر گوادر میں افسوسناک واقعہ پیش آیا ہے، جس میں9بچیاں دریا میں ڈوب گئیں جس میں سے دو کو بچالیا گیا۔
تفصیلات کے مطابق گوادر کے علاقے کلگ کے دریائے کیچ کے کنارے ایک خاندان تفریح سے غرض سے آیا تھا جہاں کچھ بچیاں پانی میں بیٹھی نہا رہی تھیں۔
نمائندہ اے آر وائی نیوز گوادر اللہ بخش نے بتایا اس دوران 9 بچیاں خود پر قابو نہ پاتے ہوئے ڈوب گئیں، جس پر ان کے اہل خانہ نے مدد کیلئے چیخ و پکار شروع کردی۔
جائے وقوعہ پر موجود تیراکوں نے فوری کارروائی کرتے ہوئے دو بچیوں کو ریسکیو کرلیا تاہم 7 بچیاں ڈوب کر جاں بحق ہوگئیں جن کی لاشیں دریا سے نکال لی گئیں۔
پولیس کے مطابق دریا میں ڈوب کر جاں بحق ہونے والی ساتوں بچیوں کی عمریں 10سے 17سال ہے، جن کی شناخت فضا بنت زبیر، فائزہ بنت سلیم، ماہتاب بنت کریم، دردانہ بنت نعیم، بشریٰ بنت غلام، شیرین بنت ناصر، ماہ زیب بنت اشرف کے ناموں سے کی گئی جبکہ مرنے والی تمام لڑکیوں کا تعلق کلگ کے علاقے سے ہے جو چھٹی کے دن پکنک منانے کے لیے کیچ ندی میں آئی تھیں۔
