اسرائیلی فورسز نے ایک سال میں غزہ کا نقشہ بدل کر رکھ دیا ہے، غزہ کے 7 اکتوبر سے پہلے اور بعد کے ہولناک مناظر پر مشتمل ایک ویڈیو سامنے آئی ہے۔
اسرائیل نے نفرت، بربریت، بے حسی اور بے رحمی کی وہ مثال قائم کی ہے کہ ایک سال میں فلسطین کا نقشہ بدل ڈالا ہے، شہر کے گلی کوچے اجڑ گئے،عمارتیں ملیا میٹ ہو گئیں، عبادت گاہیں ڈھا دی گئیں۔
غزہ سات اکتوبر سے پہلے کیا تھا، اور اب کیا ہو گیا ہے، اس سلسلے میں سامنے آنے والی یہ ویڈیو انٹرنیشنل میڈیا پر چھائی ہوئی ہے، اسرائیل اور حماس کی جنگ نے غزہ کی پٹی میں ناقابل یقین تباہی مچائی ہے۔
اسرائیل کے 25 اعلیٰ افسران اور فوجی ہلاک کیے، حزب اللہ کا دعویٰ
اسرائیل کی ایک سال سے مسلسل وحشیانہ بمباری کی وجہ سے غزہ سٹی کی 2.3 ملین آبادی کے تقریباً 90 فی صد لوگ بے گھر ہو چکے ہیں، اور اکثر نے کئی بار بے گھری کا عذاب جھیلا، کیوں کہ اسرائیلی فوج پہلے ایک جگہ کو سیف زون قرار دے کر فلسطینی آبادی کو وہاں دھکیلتی ہے اور پھر اس سیف زون پر بھی بمباری شروع کر دیتی ہے۔
غزہ کے تباہ شدہ مختلف علاقوں میں اب بھی ہزاروں مرد، عورتیں اور بچے ملبے تلے دبے ہوئے ہیں، حماس کے زیر انتظام وزارت صحت کے مطابق مرنے والوں کی تعداد 41,870 سے زیادہ ہے، جن میں 11,300 بچے بھی شامل ہیں، جب کہ زخمیوں کی تعداد 97,166 تک پہنچی ہے۔
