فلسطین کی مزاحمتی تنظیم حماس کے عسکری ونگ القسام بریگیڈ کا کہنا ہے کہ غزہ جنگ بندی معاہدے کا احترام کرنے کیلیے پرعزم ہیں۔
غزہ جنگ بندی معاہدے کے تحت فلسطینی قیدیوں اور اسرائیلی یرغمالیوں کے تبادلے کے دوران ترجمان القسام بریگیڈ ابو عبیدہ نے اہم ویڈیو پیغام جاری کیا جس میں ان کا کہنا تھا کہ معاہدے کے ثالث کار اسرائیل کو بھی اس کا احترام کرنے کا پابند کریں۔
ابو عبیدہ نے کہا کہ جنگ بندی معاہدے کی کامیابی اسرائیلی عمل پر منحصر ہوگی، اسرائیل کی جانب سے خلاف ورزی پورے عمل کو خطرے میں ڈال دے گی۔
یہ بھی پڑھیں: حماس نے 3 اسرائیلی یرغمالیوں کو رہا کر دیا
ترجمان القسام بریگیڈ نے کہا کہ طوفان الاقصیٰ معرکہ آرائی کو 471 دن مکمل ہو چکے ہیں جس نے قابض حکومت کے تابوت میں آخری کیل ٹھونک دی، ہماری قوم کی عظیم قربانیاں اور بہایا گیا خون کبھی رائیگاں نہیں جائے گا۔
View this post on Instagram
انہوں نے کہا کہ اسرائیل نے غزہ میں بہت مظالم ڈھائے ہیں اس کے باوجود ہم نے ہر جگہ صیہونی فوج کو کاری ضرب لگائی اور قابض ریاست کو عالمی قوتوں سے مدد لینے پر مجبور کیا۔
ویڈیو پیغام میں ان کا کہنا تھا کہ ہم نے دنیا کو پیغام دیا کہ قابض حکومت ایک بڑا دھوکا ہے، مزاحمتی دھڑوں کے ساتھ غزہ کے ہر کونے میں دشمن سے جنگ کی، مجاہدین نے آخری لمحے تک بے مثال دلیری اور شجاعت کا مظاہرہ کیا، ہمیں ناممکن حالات کا سامنا تھا کیونکہ یہ ایک غیر متوازن جنگ تھی۔
