جنگی جنون میں مبتلا اسرائیلی وزیراعظم بنجمن نیتن یاہو نے ایک بار پھر کہا ہے کہ امریکی صدر کو بتادیا ہے کہ عارضی جنگ بندی ختم ہونے کے بعد اسرائیل پوری طاقت کے ساتھ غزہ پر بمباری کرے گا۔
بین الاقوامی خبر رساں ادارے کی رپورٹ کے مطابق اسرائیلی وزیراعظم بنجمن نیتن یاہو کا مزید کہنا تھا کہ جنگ بندی میں توسیع کا خیرمقدم کریں گے۔
قطری ثالثی معاہدے کے تحت روزانہ 10 اضافی یرغمالیوں کی رہائی ممکن ہوسکے گی، جبکہ حماس جنگ بندی میں 2 سے 4 روز کی توسیع پر رضامند ہوگیا ہے۔
واضح رہے کہ غزہ میں عارضی جنگ بندی کا آج آخری روز ہے، حماس اور اسرائیل کے درمیان قیدیوں کے تبادلے کے تین دور چل چکے ہیں۔
غیر ملکی میڈیا رپورٹس کے مطابق اسرائیل اور حماس کے درمیان قیدیوں کے تبادلے کے لیے جنگ میں کیے جانے والے 4 دن کے وقفے کے معاہدے کا آج آخری دن ہے۔
مصر، قطر اور امریکا اس جنگ بندی کو پیر سے آگے بڑھانے کے لیے دباؤ ڈال رہے ہیں جب کہ نیتن یاہو نے غزہ میں اسرائیلی افواج سے خطاب کرتے ہوئے کہا ہے کہ ”ہمیں کوئی چیز نہیں روک سکے گی۔“
طویل تاخیر کے بعد حماس نے 17، اسرائیل نے 39 قیدی رہا کر دیے
تاہم نیتن یاہو نے بائیڈن کو یہ بھی بتایا کہ وہ رہائی پانے والے مزید 10 اسیروں کے لیے عارضی جنگ بندی میں ایک دن کی توسیع کریں گے۔
