غزہ: فلسطینی شہر رفح پر صہیونی فورسز کے حملے جاری ہیں، خطے کے اسٹیک ہولڈرز اور امریکا و برطانیہ کی جانب سے اسرائیل کے زمینی مشن کی مسلسل مخالفت کے باوجود صہیونی تیاری عروج پر ہے۔
تفصیلات کے مطابق غزہ پر اسرائیلی حملے کو 129 واں دن ہے، غزہ میں وزارت صحت کے مطابق رات بھر رفح پر اسرائیلی فضائی اور سمندری حملوں میں کم از کم 63 فلسطینی شہید ہو گئے ہیں۔
صہیونی فوج کے اہلکاروں نے مساجد اور گھروں کو نشانے پر رکھ لیا، رفح کے مضافات میں گولہ باری سے عمارتیں کھنڈر بن گئیں، غزہ میں بھی اسرائیلی بربریت کی انتہا ہو گئی ہے، تل الحوا اور ریمال سے 100 شہید فلسطینیوں کی لاشیں ملی ہیں، جنھیں سروں پر گولیاں مار کر شہید کیا گیا ہے۔
گزشتہ چوبیس گھنٹوں کے دوران 112 فلسطینی شہید اور 173 زخمی ہوئے ہیں، 7 اکتوبر سے اب تک شہدا کی مجموعی تعداد 28 ہزار 176 ہو گئی ہے، جب کہ 67,784 فلسطینی اسرائیلی حملوں میں زخمی ہو چکے ہیں۔
الاقصیٰ ٹیلی ویژن چینل نے اتوار کے روز حماس کے ایک سینئر رہنما کے حوالے سے بتایا کہ رفح پر اسرائیل کی منصوبہ بند زمینی کارروائی کے بعد قیدیوں کے تبادلے کے مذاکرات نہیں ہوں گے، ادھر یو این ادارے UNRWA کے سربراہ فلپ لازارینی نے کہا ہے کہ اسرائیل نے اشدود بندرگاہ پر غزہ کے لیے خوراک کی ایک ماہ کی سپلائی کو روک دیا ہے۔
