غزہ میں اسرائیلی بربریت کے باعث اب تک ہزاروں بے گناہوں کا خون ناحق بہہ چکا ہے، ایسے میں غزہ میں رضاکارانہ خدمات انجام دینے والے امریکی ڈاکٹروں، نرسوں کی جانب سے وائٹ ہاؤس کو ایک خط بھیجا گیا ہے۔
بین الاقوامی خبر رساں ادارے کی رپورٹ کے مطابق 45 امریکی ڈاکٹر، نرسوں کے گروپ نے صدر جوبائیڈن اور نائب صدر کملا ہیرس کوخط لکھا ہے، جس میں انہوں نے غزہ میں فوری جنگ بندی اور اسلحے پر پابندی کامطالبہ کیا ہے۔
امریکی ڈاکٹرز کے مطابق ہم نے غزہ میں جو دیکھا اس پر ہم خاموش نہیں رہ سکتے، ڈاکٹرز کا کہنا ہے کہ غزہ میں بچوں کو جان بوجھ کر زخمی کیاگیا۔
ڈاکٹرز نے بتایا کہ ہم میں سے ہر ایک نے روز ایسے بچوں کاعلاج کیا جنھیں سر اور سینے میں گولی ماری گئی، انہوں نے کہا کہ ہم چاہتے ہیں آپ وہ ڈراؤنے خواب دیکھیں جو ہمیں واپس آنے کے بعد پریشان کر رہے ہیں۔
خواہش ہے کہ آپ ہمارے ہتھیاروں سے معذور اور زخمی بچوں کے خواب دیکھیں، خواب میں زخمی بچوں کی بے قرار مائیں ہم سے ان کی جان بچانے کی منت کرتی ہیں۔
امریکی ڈاکٹرز کی جانب سے مطالبہ کیا گیا کہ اسرائیل اور تمام فلسطینی مسلح گروپوں کو اسلحے کی فراہمی پر پابندی لگائے جائے،مستقل، فوری جنگ بندی تک اسرائیل کی فوجی، سفارتی، اقتصادی مدد روکی جائے۔
غزہ میں حماس کے جانباز اسرائیلی فوجیوں کو کن ہتھیاروں سے نشانہ بنا رہے ہیں؟ وار مانیٹرز کا انکشاف
امریکی ڈاکٹرز کا وائٹ ہاؤس بھیجے گئے خط میں کہنا تھا کہ ہم چاہتے ہیں کہ آپ وہ چیخیں سن سکیں جو ہمارا ضمیر ہمیں بھولنے نہیں دیتا، ہم اسرائیل کے غزہ پرحملے کے انسانی نقصانات پرتبصرے کیلیے اچھی پوزیشن میں ہیں۔
