The news is by your side.

Advertisement

جی ڈی اے رکن اسمبلی ایک بار پھر حکومت پر برس پڑیں

گرینڈ ڈیموکریٹک الائنس کی خاتون رکن قومی اسمبلی ڈاکٹر فہمیدہ مرزا قومی اسمبلی کے اجلاس میں ایک بار پھر حکومت پر برس پڑیں۔

اے آر وائی نیوز کے مطابق جی ڈی اے کی رکن قومی اسمبلی ڈاکٹر فہمیدہ مرزا قومی اسمبلی کے جاری اجلاس میں ایک بار پھر حکومت پر برس پڑیں اور اسے کھری کھری سنا دیں۔

ڈاکٹر فہمیدہ مرزا نے قومی اسمبلی میں حکومت کی توجہ ایک بار پھر کورم پورا نہ ہونے کی طرف توجہ دلاتے ہوئے کہا کہ یہ کیسا ایوان چل رہا ہے کہ وزرا کی اگلی پوری نشستیں خالی پڑی ہیں۔

انہوں نے مزید کہ بلدیاتی الیکشن کے اعلان کے بعد ترقیاتی کاموں کے ٹینڈرز کیسے ہوسکتے ہیں، سندھ میں آئی جی پولیس کا تبادلہ کردیا گیا ہے یہ تبادلے اور ترقیاں بلدیاتی الیکشن میں قبل ازوقت دھاندلی ہے۔

ڈاکٹر فہمیدہ مرزا نے تعلیم کی ابتر صورتحال پر بھی تشویش کا اظہار کرتے ہوئے کہا کہ سندھ میں تعلیم کا برا حال ہے، نویں اور دسویں کے پرچے آؤٹ ہورہے ہیں، طالب علموں کو ایڈمٹ کارڈ بھی غلط ملے ایسے کس طرح سندھ کے بچے میرٹ پر یہاں تک پہنچیں گے۔

انہوں نے سندھ بالخصوص کراچی میں دہشتگردی اور جرائم کی بڑھتی وارداتوں پر بھی تشویش کا اظہار کیا ہے۔

واضح رہے کہ اس سے قبل قومی اسمبلی کے گزشتہ سیشن کے دوران بھی ڈاکٹر فہمیدہ مرزا نے حکومت کو آڑے ہاتھوں لیا تھا۔

انہوں نے کہا تھا کہ یہ کیسی حکومت اور اسمبلی ہے کہ وزیر خارجہ ملک کی خارجہ پالیسی بیان کررہا ہے لیکن کوئی اپوزیشن لیڈر نہیں اور ایوان کو ایک ماہ سے بغیر اپوزیشن لیڈر کے چلایا جارہا ہے۔

Comments

یہ بھی پڑھیں