کراچی: چیئرمین جوائنٹ چیفس آف اسٹاف کمیٹی جنرل زبیر محمود حیات نے نیول ہیڈ کوارٹرز کا دورہ کیا۔ نیول چیف ایڈمرل ذکا اللہ نے کہا کہ جنرل زبیر حیات کی کمانڈ میں پاکستان کی مسلح افواج مزید ترقی کریں گی اور اپنا بااثر تشخص برقرار رکھیں گی۔
ترجمان پاک بحریہ کے مطابق نیول ہیڈ کوارٹرز آمد پر نیول چیف ایڈ مرل ذکا اللہ نے چیئرمین جوائنٹ چیفس آف اسٹاف کمیٹی کا استقبال کیا۔ پاک بحریہ کے چاک و چوبند دستے نے معزز مہمان کوسلامی پیش کی۔
جنرل زبیر محمود حیات نے نیول چیف سے ملاقات کی۔ چیئرمین کو پاک بحریہ کے کردار اور بحر ہند میں پاک بحریہ کی آپریشنل تیاریوں پر تفصیلی بریفنگ دی گئی۔ چیئرمین جوائنٹ چیفس آف اسٹاف کمیٹی نے بحریہ کی آپریشنل تیاریوں پر اطمینان کا اظہار کیا۔
جنرل زبیر محمود حیات نے جوائنٹ چیفس آف اسٹاف کمیٹی کی کمان سنبھال لی *
جنرل زبیر حیات نے نیول چیف سے گفتگو کرتے ہوئے کہا کہ پاکستان کی بحری سرحدوں کے دفاع کو ناقابل تسخیر بنانے میں پاک بحریہ کا کردار لائق تحسین ہے۔
اس موقع پر نیول چیف کا کہنا تھا کہ آپریشنل اور دیگر انٹر سروسز امورکی انجام دہی اور باہمی تعاون و یکجہتی کو مزید بڑھانے کے لیے اپنی کاوشیں جاری رکھیں گے۔
