عام انتخابات کے 90 روز میں انعقاد سے متعلق کیس سپریم کورٹ میں سماعت کیلئے مقرر کردیا گیا، چیف جسٹس کی سربراہی میں 3رکنی بینچ سماعت کرے گا.
تفصیلات کے مطابق 90 دنوں میں عام انتخابات کے حوالے سے چیف جسٹس قاضی فائز عیسیٰ کی سربراہی میں 3 رکنی بینچ 2 نومبر کو سماعت کرے گا۔ بینچ میں جسٹس اطہر من اللہ اور جسٹس امین الدین خان شامل ہیں۔
سپریم کورٹ نے گزشتہ سماعت پر الیکشن کمیشن، وفاقی حکومت کو نوٹس دیتے ہوئے جواب طلب کیا تھا۔ سپریم کورٹ بار، پی ٹی آئی سمیت دیگر نے درخواستیں دائر کر رکھی ہیں۔
فیض آباد دھرنا نظرثانی کیس بھی سپریم کورٹ میں سماعت کیلئے مقرر کیا گیا ہے۔ چیف جسٹس کی سربراہی میں قائم 2 رکنی بینچ یکم نومبر کو اس پر سماعت کرے گا۔
رجسٹرار سپریم کورٹ نے اٹارنی جنرل سمیت تمام فریقین کو نوٹسز جاری کر دیے ہیں۔ عدالت نے گزشتہ سماعت پر تمام فریقین سے تحریری جواب طلب کیا تھا۔
اس حوالے سے پی ٹی آئی، ایم کیو ایم اور الیکشن کمیشن سمیت دیگر نے نظرثانی درخواستیں واپس لینے کی استدعا کر رکھی ہے۔
