لاہور: سابق وزیر اعظم عمران خان کی گرفتاری کے بعد ہونے والے پُر تشدد واقعات کے دوران زمان پارک سے 6 اہم شخصیات کی جیو فینسنگ کا ریکارڈ سامنے آگیا۔
جیو فینسنگ ریکارڈ کے مطابق 8 مئی زمان پارک اور 9 مئی جناح ہاؤس (کور کمانڈر ہاؤس لاہور) واقعے میں 154 موبائل نمبرز مشترک پائے گئے، 215 کالرز 9 مئی کو 6 رہنماؤں کے ساتھ رابطوں میں رہے، یاسمین راشد، حماد اظہر، محمود الرشید بلوائیوں سے مسلسل رابطے میں رہے۔
ریکارڈ کے مطابق اعجاز چوہدری، اسلم اقبال اور مراد راس بھی بلوائیوں سے مسلسل رابطے میں رہے، یاسمین راشد کا رابطہ بذریعہ کالز 41 بار ہوا، حماد اظہر کے موبائل نمبر سے 10 کالز شرپسندوں کو کی گئیں۔
جیو فینسنگ ریکارڈ کے مطابق محمود الرشید 75 بار موبائل رابطوں کے ساتھ سرفہرست رہے، اعجاز چوہدری کی جانب سے کی جانے والی کالز اور موصول 50 کالز ریکارڈ میں آئیں، اسلم اقبال 16 اور مراد راس نے 23 کالز جناح ہاؤس میں شرپسندوں کو کیں۔
