برلن: جرمنی کے مشرقی صوبے سیکسنی میں پولیس نے دوران تفتیش تقریباً دو بلین یورو مالیت کے بِٹ کوائنز کو ضبط کرلیا۔
غیر ملکی میڈیا رپورٹ کے مطابق جرمنی میں یہ مالیت کے لحاظ سے آج تک کا سب سے بڑا واقعہ ہے کہ حکام نے دو بلین یورو یا 2.17 بلین امریکی ڈالر کے برابر بِٹ کوائنز اپنے قبضے میں لے لیے۔
وفاقی جرمن دفتر بی کے اے کی صوبے سیکسنی میں ترجمان کائی آندرس نے بتایا کہ ادارے کی جانب سے تفتیش کے دوران ایک ملزم نے اربوں مالیت کی یہ ورچوئل کرنسی حکام کے حوالے کردی۔
رپورٹ کے مطابق حکام نے بتایا کہ کارروائی کے دوران دو مبینہ ملزمان کو گرفتار کیا گیا دونوں ایک پائریسی پورٹل چلاتے تھے، حکام نے بتایا کہ ملزمان پر شبہ تھا کہ وہ مئی 2013 تک سائبر کرائمز کے ارتکاب کے لیے ایک ایسا پائریسی پورٹل چلاتے تھے جس کے ذریعے مجرمانہ کارروائیوں کے نتیجے میں تاوان وصول کیا جاتا تھا۔
بٹ کوائن کی قیمت ڈیڑھ سال کی بلند ترین پر
صوبائی محکمہ نے کہا کہ تفتیش کے دوران ملزمان کے قبضے سے ضبط کیے جانے والے 50 ہزار بِٹ کوائن کے بارے میں شبہ ہے کہ ان ملزمان نے یہ مہنگی کرپٹو کرنسی تاوان کی رقوم سے ہی خریدی تھی۔
دوسری جانب سیکسنی پولیس کے ترجمان نے بتایا کہ یہ کارروائی بہت طویل اور تکنیکی تفتیشی عمل کے نتیجے میں ممکن ہوا، بِٹ کوائن چونکہ ایک ورچوئل کرنسی ہے، اس لیے قبضے میں لیے گئے 50 ہزار کوائنز اب سیکسنی میں بی کے اے کے ایک آن لائن والٹ میں منتقل کر دیے گئے ہیں۔
واضح رہے کہ اس وقت دنیا بھر میں جن ورچوئل کرنسیوں کی آن لائن خریدو فروخت ہوتی ہے، ان میں سے بِٹ کوائن مہنگی ترین کرپٹو کرنسی ہے۔
رپورٹ کے مطابق اس وقت ایک بِٹ کوائن کی مالیت تقریباً 40 ہزار یورو یا43 ہزار امریکی ڈالر سے زائد بنتی ہے اور ضبط کردہ بِٹ کوائنز کی تعداد 50 ہزار بتائی گئی ہے۔
