اسلام آباد : سابق چیئرمین ایف بی آر شبر زیدی نے انکشاف کیا کہ جرمنی نے 600 پاکستانیوں کے ویزے منسوخ کردیے ہیں ، یورپی ملکوں کی نظر میں پاکستان کے حالات خراب ہیں۔
تفصیلات کے مطابق سابق چیئرمین ایف بی آر شبر زیدی نے اے آر وائی نیوز سے خصوصی گفتگو کرتے ہوئے کہا کہ پاکستان بطورریاست ناکام ہوچکا، اعلان باقی ہے،یورپی ملکوں کی نظرمیں پاکستان کےحالات خراب ہیں۔
جرمنی نے 600 پاکستانیوں کےویزے منسوخ کردیے ہیں، جرمنی کا کہنا ہے کہ ان کو ویزے دیے تو واپس نہیں جائیں گے۔
سابق چیئرمین ایف بی آر کا کہنا تھا کہ ملک کے سارے لوگ بیٹھ کر اعلان کردیں کہ ہم ناکام ریاست ہیں ، اعلان کریں کہ ناکام ریاست کو درست کرنےکےلیے اقدامات کریں گے، ایساکرنے سےپوری قوم کومل کربحران سےنکلناہوگا۔
شبرزیدی نے کہا کہ پی ٹی آئی اور پی ڈی ایم کی معاشی پالیسی میں فرق نہیں صرف نیت میں فرق ہے، معاشی پالیسی دونوں کی ایک ہے لیکن دونوں کی نیت میں فرق ہے۔
ان کا مزید کہنا تھا کہ پہلے پی ٹی آئی معیشت کیلئے فیصلے کرتی تھی پی ڈی ایم کھڑی ہوجاتی تھی، اب پی ڈی ایم فیصلے کرتی ہے تو پی ٹی آئی نہیں مانتی۔
