دنیا بھر میں بجلی سے چلنے والی گاڑیاں متعارف کروانے کا رجحان بڑھ رہا ہے، حال ہی میں ایک جرمن کمپنی نے بھی اس میں کامیابی حاصل کرلی ہے۔
بین الاقوامی ویب سائٹ کے مطابق جرمن کمپنی نے سورج کی روشنی سے چلنے والی گاڑی متعارف کروا دی۔
جرمن کمپنی سونو کی سائیون نامی الیکٹرک سولر گاڑی سنگل چارج پر 190 میل کا فاصلہ طے کر سکتی ہے۔
یہ گاڑی سورج کی توانائی سے ہر سال 5 ہزار 400 میل کا فاصلہ طے کرسکتی ہے، جو ایک ہفتے میں اوسطاً 75 سے 150 میل یا روزانہ 10 سے 20 میل تک کا سفر بنتا ہے، مگر بہت زیادہ فاصلے تک اس پر انحصار نہیں کیا جا سکتا۔
کمپنی نے سولر پینلز کو چھت کے ساتھ ساتھ گاڑی کے اطراف میں بھی نصب کیا ہے جبکہ گاڑی کو بجلی سے چلانے کے لیے 54 کلو واٹ بیٹری دی گئی ہے۔
اس گاڑی کی بیٹری کو 30 منٹ میں بجلی سے 80 فیصد تک چارج کیا جاسکتا ہے اور گاڑی میں اسٹور ہونے والی بجلی کو دیگر سے شیئر کرنا بھی ممکن ہے۔
کمپنی کا دعویٰ ہے کہ بجلی غائب ہونے پر بھی یہ گاڑی خود کو چارج کرسکتی ہے مگر اس کے لیے ہوم بیک اپ سسٹم کی ضرورت ہوگی۔
واضح رہے کہ اس گاڑی کو کمپنی کی جانب سے سنہ 2023 کے وسط میں یورپ میں متعارف کروانے کا اعلان کیا گیا ہے جس کی قیمت 25 ہزار ڈالرز رکھی جائے گی۔
