کراچی : شہر قائد میں جرمنی سے آنے والاشہری گھر کی دہلیز پر لٹ گیا، ملزم اسلحے کے زور پر بیگ چھین کر فرار ہوا۔
تفصیلات کے مطابق کراچی کے علاقے بفرزون میں جرمنی سے آنے والے شہری کو گھر کی دہلیز پرلوٹ لیا گیا، لوٹ مارکی سی سی ٹی وی فوٹیج منظرعام پر آگئی ہے۔
ڈکیتی کا واقعہ بفرزون سیکٹر پندرہ اے میں پیش آیا، پولیس نے بتایا کہ شہری ایئرپورٹ سے گھر پہنچا تو ڈاکو تعاقب کرتے ہوئے آگیا، ملزم نے اسلحے کے زور پر بیگ چھینا اور فرار ہوگیا۔
پولیس کا کہنا تھا کہ بیگ میں یورو، تیرہ لاکھ روپے، دو موبائل فون اور جرمن نیشنل کارڈ موجود تھا، متاثرہ شہری نے بتایا کہ واقعے کا مقدمہ تیموریہ تھانے میں درج کرا دیا ہے۔
واضح رہے کراچی کے علاقے اورنگی ٹاؤن میں سینیٹری کے ہول سیل تاجر شاکر خان کے گھر پولیس نے ڈکیتی نما چھاپے میں ڈھائی کروڑ روپے سے زائد کی ڈکیتی کی تھی ، جس کے بعد اس تمام تر جرم میں کراچی ساؤتھ پولیس کے زیرِ تربیت ڈی ایس پی کے براہِ راست ملوث ہونے کے شواہد سامنے آئے تھے، جس کے بعد انہیں گرفتار کرلیا گیا تھا۔
