برلن: جرمنی میں پولیس نے نیوزی لینڈ حملے کی طرز پر مسلمانوں پر وار کرنے کی منصوبہ بندی کرنے والے شخص کو گرفتار کر لیا۔
تفصیلات کے مطابق جرمن پولیس نے نیوزی لینڈ حملے کی طرز پر مسلمانوں پر وار کرنے کی منصوبہ بندی کرنے والے 21 سالہ شخص کو گرفتار کر لیا۔
سرکاری پراسیکیوٹر نے بتایا کہ جرمنی کے شمالی شہر ہلدیشیئم سے تعلق رکھنے والے ملزم نے انٹرنیٹ پر حملے سے متعلق اپنے منصوبے سے آگاہ کیا تھا۔
پراسیکیوٹر کا کہنا تھا کہ ملزم نے اپنی گفتگو میں کرائسٹ چرچ واقعے کا ذکر کیا تھا جہاں دو مساجد میں حملوں میں 51 افراد جاں بحق ہوئے تھے، ملزم اسی طرز کا حملہ کرنا چاہتا تھا، اس کا مقصد مسلمانوں کو قتل کرنا تھا۔
پولیس نے ملزم کے قبضے سے الیکٹرانک فائلز برآمد کی ہیں جس میں دائیں بازو کے سخت گیر نظریات کا مواد موجود ہے۔ ملزم کو دو روز قبل گرفتار کیا گیا تھا، جس کے بعد اس پر جرائم کرنے کا ارادہ اور اسلحہ خرید کر کشیدگی کو ہوا دینے کی دفعات شامل کی گئی ہیں۔
یاد رہے کہ جرمنی میں گزشتہ ایک سال کے دوران دائیں بازو کے سخت گیر افراد کی جانب سے کئی حملے کیے جا چکے ہیں۔
