جرمنی نے ماسکو کی حمایت کرنے پر چین اور ایران کو پابندیوں کی دھمکی دے دی۔
غیرملکی خبررساں ادارے کی رپورٹ کے مطابق جرمن وزیر خارجہ کا کہنا ہے کہ چین نے روس کی حمایت جاری رکھی تو پابندیوں کے لیے تیار ہوجائے، انہوں نے الزام عائد کیا کہ چین یوکرین تنازع میں روس کو فوجی مدد فراہم کررہا ہے۔
انہوں نے کہا کہ ایران کے خلاف بھی مزید پابندیاں لگائی جارہی ہیں، ایران کی جانب سے مسلسل روس کو یوکرین پر حملوں کے لیے ڈرون فراہم کیے جارہے ہیں۔
دوسری جانب چین نے جرمن وزیر خارجہ کے روس کی فوجی مدد کے الزامات کو مسترد کردیا ہے۔
چین کی وزارت خارجہ کا کہنا ہے کہ فوجی مصنوعات کی برآمدات کو ذمہ داری سے سنبھالتے ہیں، ہم نے کبھی بھی تنازع کے کسی فریق کو ہتھیار فراہم نہیں کیے۔
علاوہ ازیں روسی میڈیا کا کہنا ہے کہ صدر ولادیمیر پیوٹن نے جوہری حملوں سے متعلق نئی پالیسی کی منظوری دے دی ہے۔
روسی میڈیا رپورٹ کے مطابق روس دشمن طاقتوں یا فوجی بلاکس کی جارحیت روکنے کے لیے ایٹمی حملے کرسکتا ہے جن کے پاس ایٹمی ہتھیار نہیں۔
روسی صدر کا کہنا تھا کہ جارحیت کرنے والے کو احساس ہونا چاہیے کہ انتقامی کارروائی خوفناک ہوگی، روس اپنا اور اتحادیوں کا تحفظ ہر صورت یقینی بنائے گا۔
