قطر ورلڈ کپ کے خصوصی اینکر غانم محمد المفتاح نے اپنی معذوری کے باوجود وہیل چیئر کا سہارا نہ لیا اور اپنے ہاتھوں کے زور پر خانہ کعبہ کا طواف کیا۔
بین الاقوامی خبر رساں ادارے کی رپورٹ کے مطابق قطر ورلڈ کپ میں بین الاقوامی شہرت حاصل کرنے والے غانم محمد المفتاح نے عمرے کی سعادت حاصل کرلی ہے۔
قطری شہری غانم محمد المفتاح جو معذوری کے باعث دھڑ کے نچلے حصے سے محروم ہیں، سوشل میڈیا پر ان کے لاکھوں چاہنے والے موجود ہیں۔
قطری صحافی نے عمرے کے دوران قرآن پاک کی آیت کی تلاوت بھی کی جس کا ترجمہ یہ ہے کہ ”اللہ کسی پر اس کی طاقت سے زیادہ بوجھ نہیں ڈالتا ”۔
واضح رہے کہ گزشتہ سال قطر میں ہونے والے فٹبال ورلڈ کپ کے موقع پر 18 سالہ غانم المفتاح نے افتتاحی تقریب میں امریکی فنکار مورگن فری مین کے ساتھ ایک مثالی مکالمہ پیش کیا تھا۔
انہوں نے کہا تھا کہ اگر میری ٹانگیں نہیں تو کیا ہوا، میرے رب نے مجھے مضبوط ہاتھ عطا کیے ہیں جو میری ٹانگوں کا متبادل ہیں اور میں انہی ہاتھوں کے سہارے اللہ کے گھر کا طواف کروں گا۔
غانم محمد المفتاح کو عمرے کے دوران مسجد الحرام کی انتظامیہ نے ہر ممکن سہولیات فراہم کیں۔ سیکیورٹی اہلکاروں نے بھی مدد کی تاکہ وہ اپنے ہاتھوں کی مدد سے آرام سے بیت اللہ کا طواف مکمل کرسکیں۔
واضح رہے کہ قطری شہری غانم محمد المفتاح جس بیماری میں مبتلا ہیں، دنیا میں بہت کم لوگ اس بیماری میں مبتلا ہوتے ہیں، 25000 میں سے ایک شخص اس بیماری سے متاثر ہو سکتا ہے، جس میں متاثرہ کا نچلا دھڑ نہیں بن پاتا۔
