مکہ مکرمہ:حرم شریف میں غلاف کعبہ کی تبدیلی کی روح پرور تقریب جاری ہے، غلاف کعبہ کی تبدیلی کا عمل چار گھنٹے تک جاری رہے گا۔
تفصیلات کے مطابق مکہ مکرمہ میں غلاف کعبہ کی روح پرور تقریب کا آغاز نماز فجر کے فوراََ بعد ہوا اور بیت اللہ شریف کا غلاف تبدیل کیاجارہا ہے، تقریب میں گورنر مکہ سمیت ممتاز شخصیات شریک ہیں۔
غلاف کعبہ خالص ریشم سے تیار کیا گیا ہے اور اس کی تیاری میں 2کروڑ 20 لاکھ ریال لاگت آئی ہے، غلاف کعبہ کاسائز657مربع میٹرہے اور4حصوں میں مشتمل ہے۔
نئے غلافِ کعبہ کی تیاری میں 150کلوگرام سونا اور چاندی استعمال ہوا ہے اور اس پر بیت اللہ کی حرمت اور حج کی فرضیت اور فضیلت کے بارے میں قرآنی آیات کشیدہ کی گئی ہیں۔
نئے غلافِ کعبہ کی تیاری میں ایک سال کاعرصہ لگا۔
غلاف کعبہ ہرسال یوم عرفہ کے موقع پرتبدیل کیا جاتا ہے جبکہ کعبہ کو غسل ہر سال دو مرتبہ شعبان اور ذوالحجہ کے مہینوں میں دیا جاتا ہے۔
اتارے جانے والے غلافِ کعبہ کسوہ کو ٹکڑوں کی شکل میں بیرونی ممالک سے آئے ہوئے سربراہان مملکت اور دیگر معززین کو بطور تحفہ پیش کردیا جاتا ہے۔
