راولپنڈی : جی ایچ کیو حملہ کیس کی سماعت آج اڈیالہ جیل میں ہوگی، بانی پی ٹی آئی کو کمرہ عدالت میں پیش کیا جائے گا۔
تفصیلات کے مطابق جی ایچ کیو حملہ کیس کی سماعت 11 بجے اڈیالہ جیل میں مقرر کردی گئی، انسدادِ دہشت گردی کی خصوصی عدالت کے جج امجد علی شاہ سماعت کریں گے۔
وکلاء صفائی سمیت پراوسیکیوٹر ظہیر شاہ پیش ہونگے جبکہ بانی پی ٹی آئی کو کمرہ عدالت میں پیش کیا جائے گا۔
اب تک استغاثہ کے ستائیس گواہان کے بیانات قلم بند کیے جا چکے ہیں، گزشتہ سماعت پرمجسٹریٹ اورپولیس ہیڈکانسٹیبل قدیر کابیان قلمبند کیاگیا تھا جبکہ سب انسپکٹرریاض کاجزوی بیان ریکارڈکیا گیا۔
گزشتہ سماعت پر ملزمان کو آئندہ سماعت پر اڈیالہ جیل میں پیش ہونے کا حکم عدالت کی جانب سے جاری ہوا تھا۔
خیال رہے جی ایچ کیوحملہ کیس کا مقدمہ تھانہ آراے بازارمیں درج ہے، جس میں بانی پی ٹی آئی، شاہ محمودقریشی، علی امین گنڈاپور، راجابشارت اورشیخ رشید سمیت 120ملزمان نامزد ہیں۔
واضح رہے 9 مئی کو سابق چیئرمین پی ٹی آئی کی گرفتاری کے بعد ملک بھر میں پرتشدد مظاہرے ہوئے تھے، جن میں جی ایچ کیو، کور کمانڈر ہاؤس لاہور سمیت حساس عسکری و سرکاری تنصیبات کو نشانہ بنایا گیا تھا۔
ان واقعات کے خلاف مختلف مقدمات قائم کیے گئے، جن کا ٹرائل اب چار ماہ میں مکمل کرنے کا حکم دیا جا چکا ہے۔
