اسلام آباد : وفاقی وزیر ہوا بازی غلام سرور خان نے کہا ہے کہ وزیر اعظم عمران خان انیس سو پچاسی سے احتساب کا عمل شروع کریں، ہم بھی حساب دینے کے لیے تیار ہیں۔

ان خیالات کا اظہار انہوں نے قومی اسمبلی کے اجلاس میں اظہار خیال کرتے ہوئے کیا، انہوں نے کہا کہ1985سے پی پی اور ن لیگ کے بہت سے دوستوں کو جانتا ہوں، جو اس وقت کچھ نہیں تھے مگر اب وہ بہت کچھ بن گئے ہیں، اب شریف صرف نام کے شریف ہیں۔

وفاقی وزیر نے وزیر اعظم عمران خان کو تجویز پیش کی کہ وزیراعظم عمران خان سال انیس سو پچاسی سے احتساب شروع کریں، ہم بھی حساب دینے کے لیے تیار ہیں۔ ان کا مزید کہنا تھا کہ ہم آج بھی اس بات پر قائم ہیں کہ مودی کا جو یار ہے غدار ہے۔

مزید پڑھیں: پی ٹی آئی حکومت احتساب کوبطورہتھیاراستعمال کررہی ہے، بختاور بھٹو

واضح رہے کہ سابق وزیراعظم شہید بے نظیر بھٹو کی صاحبزادی بختاور بھٹو نے سماجی رابطے کی ویب سائٹ پر گرفتاریوں پر ردعمل دیتے ہوئے کہا تھا کہ پی ٹی آئی حکومت احتساب کو بطور ہتھیار استعمال کررہی ہے، مشرف اور ضیاالحق بھی اس فارمولے سے مطلوبہ نتائج حاصل نہ کر سکے تھے، پی ٹی آئی کی کمزورحکومت کیسے کچھ حاصل کرسکتی ہے؟