امریکی ریاست ورجینیا کے ایک گھر سے 5 فٹ کے اینا کونڈا کو بحفاظت نکال لیا گیا۔ یہ اینا کونڈا گھر کے باتھ روم میں آرام کرتا ہوا پایا گیا تھا۔
ورجینیا کے اینیمل کنٹرول آفیسر کے مطابق زرد رنگ کا یہ اینا کونڈا ٹوائلٹ باؤل میں آرام سے لیٹا ہوا تھا۔ گھر کا مکین جب باتھ روم استعمال کرنے گیا تو اس نے وہاں اسے دیکھا جس کے بعد اس نے متعلقہ ادارے کو فون کیا۔
فون کرنے کے بعد امریکا کی اینیمل ویلفیئر کے اہلکاروں نے وہاں پہنچ کر اینا کونڈا کو بحفاظت ہٹا دیا جس کے بعد اسے سانپوں کے تحفظ کے لیے کام کرنے والے ایک ادارے کے حوالے کردیا گیا۔
اینیمل ویلفیئر کی کارکن جینیفر کے مطابق یہ اژدھا ممکنہ طور پر گھر کے کسی کونے میں بیٹھا تھا۔ سردی کی وجہ سے جب گھر کو گرم کیا گیا تو شاید گرم فرش نے اسے وہاں سے کسی ٹھنڈی جگہ منتقل ہونے پر مجبور کردیا اور اس کے لیے اسے سب سے پہلے باتھ روم نظر آیا۔
ان کا کہنا ہے کہ اینا کونڈا کی یہ نسل نہایت خطرناک اور 13 فٹ تک لمبی ہوسکتی ہے۔ یہ گھر والوں کی خوش قسمتی تھی کہ ان کے گھر میں ایک ’ننھے‘ اینا کونڈا نے پناہ لی اور کسی کو نقسان پہنچانے سے قبل ہی اسے وہاں سے ہٹا دیا گیا۔