بینکاک : رواں ہفتے نئے تھائی بادشاہ مہا وجیرالونگ کی تاج پوشی کی تقریبات کے بعد تھائی لینڈ کا 33 سالہ مقدس ہاتھی انہیں بطور تحفہ پیش کیا جائے گا۔
تفصیلات کے مطابق تھائی لینڈ کے شمال مشرق میں جانوروں کے تحفظ اور افزائش نسل کے ایک مرکز میں ملک کے نئے بادشاہ مہا وجیرالونگ کورن کی ایک بڑی تصویر آویزاں ہے۔
غیر ملکی خبر رساں ادارے کا کہنا تھا کہ وہی سنٹر ہے جہاں پلائی ایکچائی نامی ایک سفید ہاتھی بھی اپنے دن کا آغاز کرتا ہے۔تھائی لینڈ کے پانچویں بادشاہ راما کے دور حکومت میں ملنے والے اس 33 سالہ سفید نر ہاتھی کی خدمت گزشتہ برس سے بطور دیوتا کی جا رہی ہے۔
غیر ملکی میڈیا کا کہنا تھا کہ رواں ہفتے نئے تھائی بادشاہ کی تاج پوشی کی تقریبات کے بعد یہ ہاتھی انہیں بطور تحفہ پیش کیا جائے گا۔
اس سنٹر میں پلائی ایکچائی اور نو دیگر ہاتھیوں کی دیکھ بھال کرنے والے 35 سالہ تانابدہ پرومو کہتے ہیں کہ بادشاہ کے لیے ایسے ہاتھی کو پالنے سے بڑھ کر اور فخر کی کیا بات ہو سکتی ہے۔
تانابدہ پرومو کے مطابق انہوں نے اس ہاتھی کو ملک کے جنوبی سیاحتی شہر رابی سے 2010 میں خریدا تھا جہاں اسے سیاحوں کی سواری کے طور پر استعمال کیا جاتا تھا۔
قدیم برہمن کتابوں کے مطابق سفید ہاتھی میں سات خصوصیات ہوتی ہیں۔ اس کی آنکھیں، تالو، ناخن، بال، جلد اور دم کے بال سفید ہوتے ہیں۔
